Batal Puase

Belum lame ini Yung Pantit dikerjoi kekancenye  di sekolah. Singgenyo sampai bepeluh kuning. Yung Pantit kene hukum berat ceritenya.

Mpaini Yung Pantit pause, bukan main jak makan sambal terong sampai sambal belacan ade gale disiapkan untuk Yung Pantit.

“Nah Yung mulai pagi mu pause, kinak jemo banyakni puase gale, jangan ditiru nihan bapangmu,” uji ndungnye.

“Au mak, Yung ndak pause nihan anye gulainye kate mak sambal terong, sambal belacan, gulai ayam balungnye sampai buntut ayam siapkan gale,” timbal Yung Pantit. 

“Padek itu Yung, anye puase nihan jangan sampai batal. Amen bapang ni lah pernah puase jak keciak dulu, jadi amen lah tue lah mulai malas,” jawab Pak Beluk.

“Nah Yung lah dengar mu tingkah bapang tu, puase de galak agi, anye makan paling galak,” timbal Ndung Yung Pantit.

Mulailah Yung Pantit puase, anye lupe betanye dengan ndungnye, ape saje batalkan puase. Pas lah di sekolah mulai Yung Pantit ngota dengan kancennye, die mulai puase.

“Aku mulai puase,” uji Yung Pantit ngicik depan kancenye.

“Padek lah itu Yung, amen aku de lagi puase sege nihan nahan kentut,” timbal kancenye.

“Ai, amen kentut batal?” timbal Yung Pantit agi.

“Au Yung mase de tahu mu,” uji kancenye agi.

Belum lame mulai Yung Pantit nahan kentut lah tepeluh kuning di sekolah. Mane ndak kentut mane kenyang makan gulai sambal belacan, ndak temising pule.

Dalam ati Yung micut ini, jam sekolah pas pule olahraga senam pagi. Ai gawat nihan ini, mulailah Yung cicak demam, pamit dengan gurunye.

Sepanjang jalan Yung tepeluh kuning nahan kentut, singgenye sampai ke rumah masih tepeluh kuning.