Dalil Masuk Akal

PAK BELUK dengan kantin setianye, Merin, Jenaul dan Taun sedang bekumpul. Raban tu ngobrol tentang urusan agame, seminggenye seru nian. Sebab jeme empat sekawan tu saling besikukuh dengan pendapatnye. Obrolan jeme ini tentang jualan duit hasil minuman keras, ade ye ngicikan haram ade ye ngicikah dide.  

“Kalau aku ngicikan jualan minuman itu tetap halal, dide sependapat dengan kabah Merin,” kate Pak Beluk bekerasan dengan pendapatnye.

Merin juge dide galak ngalah, katenye “Oii kabah, minuman beralkohol itu jelas – jelas dalam Islam haram diminum. Jadi kalau kite njualkah barang ye haram diminum, pasti hasilnye jadi haram. Kabah ini lah salah masih bekeras saje,” kate Merin negaskah.

Jenaul nyintung “Kalau nurut aku kamu bedue itu benagh gale, anye cube sampaikah tentang aturan agamenye”.

“Naaa kamu ni dide percaye dengan aku, ketentuan itu jelas nian. Bacelah surat Al Qu’ran  Al-Baqarah: 219, An-Nisa: 43 dan Al-Maidah: 90-91,” tegas Merin PD nian.

“Cacam, model ustad pule kabah ni ce, salah sangke aku. Keruan nian kabah tentang larangan tentang minuman mabukah,” ungkap Taun salut dengn Merin.

“Oiii kabah, itu tentang larangan minuman alkohol. Ukan tentang hasil penjualan minuman beralkohol, kalau tentang ayat itu aku dide mbatah. Jelah nian, jelas gale itu,” kate Pak Beluk serius.

Tambah Pak Beluk agi “Kalau hasil njual minuman itu duit halal, sebab kite dide diminumi alkohol itu”.

Jenaul nyambung  “Oi kantin, duit itu hasil dide benagh. Jadi sepakat aku duit itu haram, kabah ini dide nyambung bapang Yung”.

“Nyambung aku, tapi aku ngicikan duitnye tetap halal. Kamu bedue ini dide keruan tentang azaz hukumnmye,” kate Pak Beluk dide ngalah.

“Udim, aku lughuskah kalau mbak itu. Duitnye memang halal, anye hukum di duit itu haram, sebab didapatkah njak care barang ye diharamkan hukum Islam,” kate Taun nengahi.

Agak mendam Pak Beluk, kenan agak bingung kah mbatah kicik Taun. Akhirnye kenan ngicik juge “ Dalil masuk akal kabah sampaikan itu ce, itu sepakat aku:”*