Masih Angat

MALAM kemaghi, Pak Beluk ngan bininye Ndung Yung duduk di berende ghumahnye. Pas mulai ngicik Ndung Yung langsung mintak tanci ngan lakinye.

"Bapang Yung aku pagi ndak mandi ke pantai ngan rombongan besti aku," kate Ndung Yung mulai ngicik.

"Nah, ngape pule sangkan kamu ndak mandi nian," timbal Pak Beluk.

"Itulah kamu tu ndik keruan, mangke aku ni kurus agi luk aku gi gadis dulu," uji Ndung Yung.

"Udimlah Ndung Yung. Cube kamu kinaki ikan paus tu, tiap aghi diayik tula die, anye masih besak tulah badannye," timbal Pak Beluk luk dide bersalah.

Ndengar lakinye ngicik luk itu, Ndung Yung langsung balik ke dalam. Pas akap paginye Pak Beluk bekendak ngan bininye.

"Ui Ndung Yung, amun kamu ke pasar kele belika aku buah-buahan awu," kate pak Beluk.

"Ndak batan tape pule kamu buah. Awak lah tue banyak pule pintakaan," timbal Ndung Yung rengam.

"Ndak nyegarkan muke aku. Mangke lemak juge dikinak jeme," uji Pak Beluk pede nian.

"Udim lah jangan kesandangan ige jadi jeme. Cube kamu kinaki beghuk tu, tiap aghi makan buah tulah die. Masih luk beghuk tulah dayinye. Ndik ke ngade jadi luk artis," timbal Ndung Yung sambil pegi ke pasar. 

“Yak madak nian kamu ni, mbalas tulah dalam utak kabah ndung Yung aii,” kate Pak Beluk.

“Au die, kini kite draw. Satu sama bapang Yung, aku masih angat kicik kabah di malam,” kate ndung Yung cemberut.