Nurai Perangai Bapang

Lum lame ni Ndung Yung marah nian dengan anaknye Yung Pantit. Sebab, waktu balik sekul di buku pelajaran matematika Yung Pantit dapat 0 gale.

Karena penasaran tape saje kerje Yung di kelas, Ndung Yung betanye langsung dengan anak semata wayangnye tu.

"Yung tape pule kerje kaba di sekul selame ini. Ngape sangkan kaba lah sebesak ini masih kilah dapat 0 soal pertambahan," tanye Ndung Yung.

"Yak, lah nyelah gale base jawaban aku tu mak, dasar guru saje ye ndik terti," Yung pede nian njawab.

"Kengade nian guru ndik ngerti, dide kah diangkat jeme guru amun dide terti," kate Ndung Yung.

"Nah kamu ni dide percaye ngan aku," Yung masih nggub kalah.

"Nah, cube aku uji kudai, amun 2+2 beghape jawabannye," tanye Ndung Yung serius.

"Yak gampang nian itu mak, lah pasti 22 jawaban die," jawab Yung pede.

"Nah, luk ape sangkan pacak 22 tu jawaban die Yung ai," Ndung Yung lah mulai kesal.

"Kan soalnye 2+2, amun di tulis sepasighan lah njadi 22 mak, mase ndik terti kamu ni," Yung njelaskah panjang libagh.

"Ai cacam Yung ai, dide ke maju nian dapat 0 kaba ni amun luk inilah. Jeme tu amun dide pacak jangan cakmacak. Anye tape, iluk penean, nurai perangai bapang kaba tu, kan jemenye besak palak awak bigal," kate Ndung Yung sambil balik ke belakang karene lah rengam.