Tejebak

Reporter: Admin |

Editor: Admin |

Minggu , 12 Nov 2023 - 19:47

Pak Beluk--

tejebak                            udim makan petang kemaghi pak beluk duduk di berende depan rumahnye. ndik lame tu, yung pantit anak kenan duduk pule. udim tu, yung langsung betanye dengan bapangnye tu.
"bak ade ye aku ndak tanyekan ngan kamu tu," uji yung mulai ngicik.
"nah, tape die pule yung. tanyekelah, amun pacak kele mangke langsung ku jawab," timbal pak beluk.
"anu bak, tadi waktu di sekul tadi guru agama kami ngatekan bahwe manusie ni di ciptakan njak tanah gale," tanye yung.
"awu memang luk itu, kan ade pelajaran die di sekul yung, bearti ngenian titu," jawab pak beluk.
"nah, amun segale jeme ni diciptakan njak di tanah gale, ngape sifat manusie ni beda gale," yung ngulang betanye agi.
"nah, gampang nian kerje kaba tu yung. kaba ndak keruan ndik, basekah empuk manusie ni njak di tanah gale, tapi lain-lain tanahnye," timbal pak beluk.
"maksudnye luk ape titu bak, ngape tambah bingung aku," uji yung.
 "luk ini, aku contohkan dikit, amun jeme ye sifatnye lemah lembut, sejuk njak di care ngiciknye uluk bapang kaba ni. pasti diciptakan njak di tanah wakaf," kate pak beluk pede nian.
"ui luk itu bak. lalu luk ape dengan mamang merin tu, jemenye diam tapi pendayian die seram tegale," tanye yung agi.
"nah, amun merin tu pasti diciptakan njak di tanah kuburan. jadi itulah sangkan ade aura seram di muke mamang kaba tu," jawab pak beluk.
"masuk akal nian pule bak. udim tu, luk ape amun dengan ndung kite (bini pak beluk, red). sebab, ku inak maju ndak marah tula kerjenye," yung ngulang betanye agi.
"na, amun itu karne ndung kamu tu tecipta njak di tanah sempit. jadi atinye maju nyempit tula dan unung-ujungnye marah kembelean die," jawab pak beluk ngicik alun. takut kedengaran ngan bininye.
"nah, ngenian pule amun luk itu bak. udim tu luk ape ngan om ujang kericup tu bak, ngape kerjenye maju ndak main janda saje tu. diciptakan njak tanah ape die tu," kate yung betanye agi.
"mungkin amun itu karne ujang tu diciptakan njak di tanah ye bekas lokasi janda nian. jadi, wajar kalu die maju ndak ngijekan janda ngam cewek saje," timbal pak beluk.
"wai masuk akal nian bak. laju amun aku ni diciptakan njak di tanah ape bak," yung penasaran.
"nah, amun kaba ni pasti njak tanah sengketa. sebab, kaba ni kepo nian, banyak betanye, pengadu dan ngajak ribut tula kerje kaba. ude, baliklah ke kamar tiduk iluk," jawab pak beluk rengam.
"awaslah bapang ku aduka ngan ndung," ancam yung.
"ui jangan nian nak. ude ndak tape kaba, kele bapang belika. balak kele, tejebak bapang ini," kate pak beluk mpai sadar. (roh)

Tag

Share

Koran Terkait

Kembali ke koran edisi Radar Kaur, Senin 13 November 2023

Berita Terkini

Berita Terpopuler

Berita Pilihan