Bucur Alus

PAS libur petang kemaghi, Yung Pantit dengan bapangnye Pak Beluk pegi ndalak batan pembukean puase.

Sebab, di ghumah lum ade batan pembukean, pedahal saghi tu masih puase petame.

Karne tepikir lah lame dide makan nasi goreng, Yung Pantit ngajaki bapangnye beli nasi goreng saje batan pembukean.

Singkat cerite, Pak Beluk ngan anaknye sampai di badah tukang jual nasi goreng tu.

Tapi, kali ini due beranak ni beli nasi goreng di bada penjual yang baru. Bukan bada langganan biasenye.

"Mang tolong bungkus nasi goreng tige," kate Yung Pantit.

"Oke dek, silakan duduk dulu di kursi," uji tukang nasi goreng.

"Awu mang," timbal Yung singkat.

"Nasi gorengnye pedas ape dide dek," tanye ntukang nasi goreng.

Ndengar pertanyean tukang nasi goreng tu. Yung Pantit luk adak saje jawabnye.

"Yak mane keruan ngan aku mang. Aku ni masih puase, luk ape aku ndak ngecapnye," timbal Yung luk dide bersalah.

"Ui awu keruan ngan aku. Anye kamu ni ndak nasi goreng ye pedas ape ye sedang saje," kate tukang nasi goreng lah mulai ngangat.

"Yak buyan pule kamu ni mang. Dide pacak aku ni ndak ngecapnye. Kan lah aku kicikka aku ni masih puase," jawab Yung agi rengam pule.

"Ai entah kendak kamulah hai. Ku lantak cabe bebanyak mangku keghasean ngan kamu. Bucur alus serumah kamu kele mangku kerasean," gumam tukang nasi goreng dalam ati.