Besak Palak

YUNG Pantit kini lah mulai dikenal jeme rami. Semingge kalu ade ndalak die cukup nyebutkah name dia, cekie jeme keruan gale. Tapi kini Yung Pantit mulai beda dengan dulu, mulai njak rukuk pakaian lah bedah nian. Pakaian lah setil nian, rukuk kah mantap manjangan. Sayangnye die dide ade ngingatkah, sebab jeme dide berani. Bapangnye Yung lah mulai agak ringam dengan care Yung Pantit kini.

“Yung kabah lah mulai dikenal jeme rami, anye jangan nian care kabah ye dulu diubahi gale. Tetaplah tampil sederhana model dulu, jangan kah diubah gale,” kate Pak Beluk.

Nganing bapangnye nasehati Yung agak dide anjam “Yak bapang, aku ini dide berubah. Masih model dululah, masih anak dighi. Masih bename Yung Pantit, dide ade berubah nian. Kalau sekedar penampilan itu wajib dijage bapang”.

“Au, apa ye kate kabah itu ade benaghnye. Anye care kabah mulai berubah nian, dide iluk model itu. Kabah pehatikah rude mobil motor itu Yung, pasti beligat tulah. Ade waktu di bawah ade waktu di pucuk. Model itulah kehidupan kite di dunie ini, ade waktunye gale,” nasehat Pak Beluk.

Agak tesinggung Yung, die njawab dengan ketus “Oii bapang, kite ini jangan dicontohkan dengan bende. Itulah salah kekamu jeme tue ini, anak lah tampil beda mulai banyak protes nian. Padahal itulah harus dilakukan jaman mbak ini bapang”.

“Oiii nak, kabah ini mpai naik dikit. Belum teunjak nian, kalau giliran kabah sedang di bawah tepijak taik. Mpai kabah keruan, hidup ini sege gale, mane lah di bawah dide ade jeme galak bekantin dengan kite. Jadi kabah mpai begaul dikit jangan besak palak, kalu meletup,” kicik Pak Beluk pasang udim.