Panitia Artis

Pak Beluk ngah Merin ni ceritenye njadi panitia. Ade acara ngundang artis dangdut jak ibukota.

“Paling ndik gratis nonton awak,” uji Pak Beluk.

“Yak…Kaba ni ndak ade maksud tulah. Panitia tu begawih,” uji Merin.

“Begawih pule, nonton artis pule. Ade alasan ngah jeme ghumah ngeluar malam,” kate Pak Beluk.

“Nah…Bejalan nian otak kaba ni men arah ke situ. Nipukah bini tulah nian kepandaian kaba ni,” timbal Merin.

“Adak lukmane, base idup ni ndak panjang die akal ce,” jawab Pak Beluk.

Lah nyampai hari terakhir persiapan. Deduncung saje Pak Beluk ngah Merin ni datang ke lokasi. Lah terakhir pule ughang due ni datang. Men kursi lah ndak udim diangkuti. Ndik lame nyampai, makan siang.

“Alangkah pas kite ni nyampai,” bisik Pak Beluk ngah Merin.

“Dediamlah, kele endik dapat jatah nasi kotak kite ni,” kate Merin, bebisik.

“Nah…Ade Pak Beluk ngah Merin kirenye. Malah makan, ngambiklah nasi kotak,” kate panitia.

“Siap ketua…Kami ni tadi gi akap pegi. Anye pecah ban 2 kali. Tape bonceng Merin beghat ngah dose,” uji Pak Beluk.

“Oh…Awu namenye musibah,” kate ketue, bijak.

Pas udim makan, lah beringgak balik ughang due ni. Pas ngambik motor, tekanjat Pak Beluk. Nginak ban depan ngah belakang kempes gale.