Pecah Kongsi

KARENE ndung Yung bejijih njak akap, pale Pak Beluk lah mulai pusing. Tepat nian aghi Jumat, semingge kenan masih jam 11.00 WIB lah berangkat ke masjid. Pas nginak Pak Beluk lalu di depan ghumah Merin mendam saje, kenan lah nebak agi dide akor di ghumah ini. Pak Beluk juge dikinak Taun lah pegi sebelum jam 12 siang. 

“Pasti tetiduk lanang ini jeme khutbah kele, ceki nian. Dide kah aku maraki duduk kele waktu jumat,” dalam hati Taun.

Singkat cerita lah masuk Jumat nian, Taun duduk njauhi Pak Beluk. Nginak Taun njauh Merin maraki Taun. 

“Ngape kabah jauhi bapang Yung, kite paraki saje. Pasti tetiduk die jeme khutbah kele, dide kah dibangunkan jeme. Sebab die jam 11 tadi berangkat, biasenye jam itu die tiduk kudai, ncuguk jam 12 kurang dikit. Baru besiuk berangkat jumat,” bisik Merin ke Taun.

Timbal Taun sambil bebisik “Ngekelah kudai, biar die jere kudai sekali ini. Supaye die tahu pule retinye bekantin iluk tu”.

Singkat cerite jeme lah khutbah nian, ceki nian Pak Beluk tiduk. Dide ade jeme marakinye, waktu jeme lah udim khubah kenen masih tiduk. Jeme dide ade mbangunkah, didiamkah jeme saje sampai jeme udim sembayang. Lah udim sembayang jeme balik gale, dide ade juge ncugukah kenen tiduk duduk tu.

Terakhir Iman waktu kah balik tekejut, sebab di belakangnye ade Pak Beluk tiduk duduk. Iman kesal juge, sebab sebanyak ini jamaah dide mbangunkan Pak Beluk Jumat. 

Imam maraki Pak Beluk, langsung ditetepuknye balung Pak Beluk “Bangun ce, bangunlah”.

Spontan Pak Beluk ncuguk dan mulai betegak, sikap kah sembayang. Waktu di betegak tekejut kenan, sebab dide ade jeme agi selain die dengan jeme ncugukah dia. Dalam ati kenan “Cacam, aku ini lah matik ape mimpi. Ape jeme lah udim sembayang”.

Pak Beluk nulih ke imam, kenan ngicik “Ngape sepi pak imam”.

“Jeme lah balik gale, kabah dide dibangunkah waktu jumat dan jeme balik tadi”, sampai iman dengan lembut.

“Aiii cacam, palak bapang nian Merin dengan Taun ini. Pecah kungsi dengan jeme due ini mbak ini. Saling malukah nian, dide nian,” ranyam Pak Beluk purik sambil nyandang kain balik.