Ngingilan

Belum lame ini Pak Beluk berayak ke rumah kancenye Merin. Banyak cerite Pak Beluk dengan Merin sambil nunggukan aghi malam. 

Amen berayak ke rumah kancenye, kupi segelas besak rukuak mbak telapak alias Gudang Garam Surya 16 gratis jak Merin. Maklum die ambis panen buah kawe tambah regenye selangit.

Singkat cerite Pak Beluk heran alangkah banyak jeme berayak ke rumah sakit, siang malam rami saje. Dalam ati Pak Beluk,  ceki di rumah sakittu galak hajatan besak. Mangkenye rami saje. 

“Merin, alangkah rami rumah sakit kini. Neman nihan hajatan itu,  ceki bosnye betanci,” kate Pak Beluk.

“Ngape, ngape, ngape Pak Beluk,  lah udim makan mu,” timbal Merin cecak tuli.

“Belum tige kali Merin. Amen makan de ketinggalan,” uji Pak Beluk agi.

“Nah, amen udim makan cube ulangi lagi kate mu tadi, mangke jelas,” timbal Merin agi.

“Rumah sakit kini rami, kate aku tadi. Bukan jeme hajatan, singkenye banyak bawak pule makanan,” uji Pak Beluk agi.

“Dimane-mane rumah sakittu rami Pak Beluk,  itu tandenya banyak jeme sakit,” ujar Merin.

“Ai, ngape pule banyak yang sakit madak musim hujan. Galak makan de kah sakit,” uji Pak Beluk.

“Bukan masalah hujan, galak hujan nilah banyak penyakit datang. Base trend kini penyakit Demam Berdarah Dengue (DBD),” timbal Merin.

“Ape pule itu, sape pule buat penyakit DBD tu Merin?” tanye Pak Beluk.

“Biase saje amen base kite dusun agas alias nyamuk,” ujar Merin.

“Ai cacam, ngape pule agas tu Merin. Pasti saje ngingilan amen care jemeni,” uji Pak Beluk.