Jeme Dusun Nian

Reporter: Rohidi Effendi |

Editor: Dedi Julizar |

Senin , 22 Apr 2024 - 20:46

Pak Beluk--

jeme dusun nian                            libur kemaghi pak beluk ngajak anak bininye berayak. die tige beranak ni pegi ke kota bengkulu.
sampai di kota bengkulu, pak beluk langsung ngajak anak bininye pegi ke bim (bencoolen mall).
singkat cerite, pas lah masuk di bim tu, ndung yung ye dide pernah sekalipun ke situ langsung tekejut nginak rege jualan jeme tu.
sebab, segale jualan bajut dan celane dan jualan lainnye di situ ade tulisan 20 gale tepapang besak.
jadi, dipikir ndung yung nyelah rege baju ngan celane tu 20 ribu sikuk.
"alah ke murah-murah jualan jeme disini awah," pikir ndung yung.
tanpa pikir panjang, ndung yung langsung ngambik rantang, udim tu besasut ngambik baju ngan calane ye alap-alap tu.
pas lah ndak mbayar di kasir. ndung yung tekejut bukan main sekaligus maluan.
"jadi semuanya rp 2.500.000 buk," kate kasir ye melayani ndung yung.
"yak nengape bai. kalu salah hitung kamu ni dek," kate ndung yung tekejut.
"tidak buk, itu sudah sesuai dengan harganya," timbal kasir tu agi.
"cube kaba hitung kudai iluk-iluk. aku ni cuman beli baju 5 butik ngan celane 5 butik. amun aku itung tadi gi 200 ribu gegalenye," kate ndung yung.
"maksudnya gimana buk," kasir bingung.
"kan kinaku rege baju ngan celane ye kamu jual ni ade gale tulisan 20. nah, bearti regenye 20 ribu sikuk baju ni kan," ndung yung njelaska.
"aduh buk, itu bukan harga, tapi itu tulisan semuanya jualan disini sedang ada diskon 20 persen," kate kasir njelaska.
"ntuk luk itu awah. udim urung saje aku mbeli amun luk itu jalan ceritenye," kate ndung yung maluan.
"aduh buk, gi mana ceritanya ini. kalu ngga ada duit  jangan asal comot aja dong," kasir rengam.
nginak kerjean bininye, pak beluk ngan anaknye yung pantit njauh luk ndik jeme ndik kenal saje.
"ai nampak nian jeme dusun ndung yung ni," pikir pak beluk. 
sementare ndung yung masih kebingungan, sebab laki dengan anaknya dide tekinak. dalam ati ndung yung “oii malukah nian aku ini, sampai anak dengan laki ku dide maraki”.

Tag

Share

Koran Terkait

Kembali ke koran edisi Radar Kaur, Selasa 23 April 2024

Berita Terkini

Berita Terpopuler

Berita Pilihan