Dibatak Mati

UDIM mandi petang kamaghi, Merin nagih hutang ke rumah kancenye, Pak Beluk.

Sebab, Pak Beluk pas ditagih bulan belakang berjanji mbayar hutang bulan due.

Kebetulan, mbak ini di kalender lah bulan due. Jadi pas pikir Merin nagih hutang tu.

Singkat cerite, pas lah sampai ghumah Pak Beluk, Merin dide panjang libagh agi langsung ngicikka tujuannye.

"Luk ape Bapang Yung, uji kate kaba bulan kemaghi, nunggu bulan due mangke kaba ndak bayar hutang. Ini lah bulan due lah," tanye Merin iluk-iluk.

"Kudai sabar saje ce," timbal Pak Beluk.

"Yak kan kaba tulah bejanji ndak bulan due nian bayarnye," kate Merin agi.

"Pakai tape mbayarnye ce, sabar kudai," jawab Pak Beluk.

"Itulah amun lum bedie jangan ngicik bulan due tu," kate Merin rengam.

"Yak ngenian aku tu. Ndik bedie salahnye. Kan mbak ini masih sikuk tulah bulan ni. Ndik pernah aku tekinak pucuk langit tu bulan kite jadi due. Jadi sabar kudai awu ce," Pak Beluk njelaska luk padek nian.

"Yak, amun itu ndak sampai mati dide kan bayar hutang kaba ni Bapang Yung. Sebab, sampai kebile kina dide kah nambah amun bulan ye itu," Merin tambah ngangat.

"Nah mangke luk ape," kate Pak Beluk.

"Udelah bapang Yung, banyak ige ragam kaba. Ukan tu pengiluk ngucaki jeme tue ni. Amun lum pacak bayar hutang, jangan bejanji kapuh. Tue ndik nue kaba ni. Hutang tu dibatak mati kabah, walau kecil," Merin ngiciki Pak Beluk.