Pakai AI

Seribu akal Pak Beluk merencanekah mecahkan puase, sampai- sampai mbudikah ndung Yung dia bidapan. Ini dilakukan bele supaye dide kene ringami bininye ketike dide puase. Karena tepat alasan, kondisi badannye sedang bidapan. Anye ulah Pak Beluk ini diketahui bininya, karena nginak status WA merin sedang main biliard. Dalam video ini Pak Beluk sihat, kuat dide ade lemasnye. Kalu di ghumah badannye lemas, pakai koyok dengan bekain.

"Aaiiii njangkap nian kabah ini, lah pembuhung nihan kabah ini. Dide bidapan selame ini, kabah bidapan di ghumah ini supaye ade alasan dide puase," kate ndung Yung Pantit.

"Yak ngape kabah lah marah – marah ini, bulan puase harus besabar. Ape lagi kabah yang sedang puase," jawab Pak Beluk nada lemas sambil mbujuk.

"Ai udimlah kabah nada lemas-lemas ini, pembuhung kabah bidapan itu," sambil ngikinakah video Pak Beluk main biliard dengan Merin.

"Itu ukan aku ndung Yung," kate Pak Beluk ngeles.

"Terus sape itu, hantu," jawab bibainye.

"Entah, kalu ade yang edit mirip aku. Kinilan pacak pakai AI itu," kate Pak Beluk.

Karena takut ketahuan, Pak Beluk mulai betingkah model pale pening.

"Aiii ngpe pale ku ni, kudai-kudai," alasan Pak Beluk sambil jalan ke kamar.

"Alasan gale, dunie lah canggih. Lah pakai IA nian. Kele selingkuh pakai AI juge," jawab bibainye ringam.