Tecapai Tujuan

PAK BELUK hanye tejenggu di kursi panjang ye bekasur setiap aghi selame bulan puase ini. Ndung Yung lah purik nginak lakinye ini, sebab kebutuhan antak ke reraye pasti betambah besak. Semingge mbutuhkan duit tambah besak, anye lakinye dide ade mencari, setiap aghi hanye tepadar di kasur.

“Oiii bapang Yung, kite ni makin parak ke reraye. Lukmane kabah ini mendam saje tiap aghi di kasur ini,” kate ndung Yung.

Pak Beluk mbukak mate “Ya lah keruan aku, kalau puase ini makin lame makin parak reraye. Jadi dide kabah njuk tahu aku lah keruan nian”.

“Syukurlah kalau keruan, jadi jangan tekelap tiap aghi di kasur ini. Kalau dide ade ndalak kerje atau uashe dide akan datang duit bapang Yung,” kate bini  Pak Beluk.

“Naa inilah kabah, lukmane aku kah kerje kalau utak beku peghut lapar liagh haus ini. Jadi nikmati saje ape ye dinjukah tuhan ndung Yung. Jangan purik, cukup syukuri ape adenye saje,” kate Pak Beluk PD.

“Aiii cacam, oii kabah bemalu dikit. Mase kalah dengan jeme lain kabah, jeme lain masih bedalak lukak selame puase,” ndung Yung puri.

“Oiii aku litak puase ni, kalau ngajung aku ndalak lukak siapkah ibatan tiap akap,” tegas Pak Beluk santai.

Ndung Yung bingung nganing kicik lakinye, kalau diaukah semegi saje die ngerestui dide puase. Anye kalau dide diaukah, dide kah kerja setue ini. Akhirnye dia ade akal supaye keruan nian ape maksud lakinye ini.

“Kini kendak kabah ye mane, aku jadi gale. Tapi kebutuhan ghumah antak ke reraye tepenuhi,” tegas ndung Yung.

“Kalau mbak itu, siapakh ibatan dengan gulai tiap akap, aman gale kele ndung Yung,” tegas Pak Beluk serius.

“Oiii lanang aiii, modus nian ini. Tecapai tujuan utak hati iblis, ya tuhan aii,” kate ndung Yung beratapan.*