Perang Due

Lum lame ni Merin berusik ngan kance lamenye Pak Beluk. Due sekawan ni mbahas soal jeme ghumah ye ngajung berenti ngudut.

"Lah berape aghi ni maju jeme rumah ni sibuk ngajung aku berenti ngudut," kate Pak Beluk mulai ngicik ngan Merin.

"Awu aku juge same ce, tapi menurut aku seharunye rokok ndik bedie di dunie ni," jawab Merin.

"Awu setuju itu, aku juge sedang ndak luk ape carenye rokok ni habis di muke bumi ni," saut Pak Beluk agi.

"Itulah, sebenarnye ade care ye paling alap, bakar pabrik rokok tu, tapi aku takut berurusan dengan Polisi, masuk penjara, diciduk. Aku dide galak ambik risiko tu," kate Merin.

"Nah, amun menurut aku lah alap lah care aku ni ce, supaye rokok ni abis, nyelah aku silap satu-persatu rokok tu. Tiap aghi maju aku silap, udim tu aku isap sampai habis. Jadi amun jeme nginak aku ngudut tiap aghi, jangan agi ditengul, lah nyelah itu care aku supaye rokok ni abis" jelas Pak Beluk.

"Masuk akal kerje kamu tu ce, aku setuju itu," timbal Merin.

"Awu silaplah terus, sampai busung tu mutung, luk rokok tulah," Ndung Yung langsung nyintung kicikkan die bedue tu.

"Anu ce, aku kah balik kudai, ngape luk lah ke mulai perang due ke-10 ni," kate Merin sambil langsung balik ninggalkah Pak Beluk. *