Isi Ulang

Bulan puase tahun ini Yung Pantit maju puase pule. Anye nampak nian kenan maju kelitakan waktu puase.

Karne ndik tega nginak anaknye kelitakan, Pak Beluk ngajung anak sematawayang nye tu mandi saje. Sebab, amun mandi pikir Pak Beluk dide kah terase nian die.

Anye lah lebih sejam Yung di kamar mandi ndik kilah keluar-keluar. Pak Beluk mulai curiga dengan gelagat anaknye tu.

"Yung! Kaba tu mandi ape mbukak usaha pemcucian," gauk Pak Beluk.

"Kudai bak, jerang agi," timbal Yung njak dalam kamar mandi.

Anye njak luar tu shower masih saje bemuni. Pak Beluk tambah curiga.

"Kudai, kalu tekelap lanang ini," uji Pak Beluk sambil bejalan ke arah kamar mandi.

"Hui Yung, bukan duare ni," kate Pak Beluk njak depan kamar mandi, udim tu duare kamar mandi langsung tebukak karne memang ndik tekunci. Pak Beluk langsung tekejut nginak anaknye betegak di bawah shower, palaknye mendongak, mulut tecangak lebar sambil minum air dari shower luk jeme lagi isi ulang galon.

“Yung!!! Tape kerje kaba ni ?," kate Pak Beluk langsung ngejutkah Yung.

"Ini lagi mandi bak," timbal Yung.

"Amun luk ini ukan mandi Yung, kaba ni lagi isi ulang busung, ude lah batal puase kana tu amun luk itu," Pak Beluk bejijih.

"Yak dide batal aseku bak, kan aku dide keruan dan lupe. Udim tu tadi kamu ye ngajung aku mandi. Jadi puase kamu batal pule bak," Yung nimbal.

"Ai entah kendak kabalah Yung," Pak Beluk langsung larat.