Babon Iluk

Petang kemaghi Pak Beluk ngerayau ke pasar. Kenan ni, nginak baju baru batan kundangan pesta bada kancenye di kota besal. Bebaris saje singgenye pedagang baju di pasar nawarkah pakaian nga Pak Beluk. 

“Cakagh tape mang, baju celane kinakla kudai kalu ade nye selire,” bujuk pedang baju nga Pak Beluk. 

“Aii, ndak cakagh baju batan kundagan, ade dide bada kamu ni,” tanye pak Beluk nga pedagang. 

“Banyak mang, masuk kudai kinaklah di dalam ni, banyak baju nye alap batan kundangan, ngerayau nga batan kerje,” promosi tukang baju. 

“Nah-nah, banyak nian jenis baju kaba ni ce,” Pak Beluk sambil noleh ke dalam dagangan. 

“Ame baju nye putih polos kemeja tu berape regenye ce,” tanya Pak Beluk. 

“Nye ni mang,” pedagang sambil nunjuk baju nye dikicikka nga Pak Beluk. 

“Awu, kemeja putih polos, luk baju pejabat tinggi tu,” tunjuk Pak Beluk. 

“Kalu nye ni agak mahal mang regenye,” timbal pedagang.

“Nah, berape pule regenye, ame duitni cukup pacak aku bayari,” jawab Pak Beluk. 

“Baju ni ingkan mahal kate jeme karne baju ajaib," sambil tetawe pedagang ngenjuk baju tu nga Pak Beluk.

"Kudai baju ajaib luk ape kate kamu tu ce, bebenar kudai," Pak Beluk bingung.

"Awu mang, base baju luk ini amun kate jeme baju kebal hukum ni, jadi wajar saje amun dikicikka baju ajaib," uji pedagang njelaska panjang libagh.

"Ude bungkuslah itu, aku galak amun ade ye berbau ajaib apelagi kebal hukum. Pasti mantap nian aku makainye kele, pasti bakal dapat babon iluk," Pak Beluk semangat nian.