Paling Bigal

MALAM kemaghi, Yung Pantit anak semata wayang Pak Beluk lagi gelisah karne ndak ngadapi ulangan semesteran.

Karne lah bene belajar, Yung Pantit langsung mintak tolong dengan bapangnye ye kebetulan lagi santai.

"Bak tulung ajari kudai aku ni, pagi aku ni ndak ulangan matematika, ngape sege nanan pecaknye soal ulangan ni," kate Yung.

Pak Beluk ye sebelumnye maju ngakuk pintar dengan anaknye tu langsung betegak.

"Mase empai ulangan matematika saje lah bene palak kaba Yung. Base matematika ni soal paling mudah, amun aku dulu maju juara njawab matematika ni," kate Pak Beluk luk padek nian.

"Nah, itulah amun luk pasti paham nian kamu soal ye luk ini," tanye Yung agi.

"Nah, amun soal ini kurang paham nian aku Yung, soalnye lah bedah dengan pelajaran kami dulu," timbal Pak Beluk ye masih luk padek tulah.

"Kate tadi kamu dulu maju juara bak, mase soal luk ini ndik terti," Yung mulai penasaran.

"Yak awu, base aku ni dulu setiap ulangan maju dapat juara, njak belakang," timbal Pak Beluk jujur.

"Yak ngape sangkan dikicikka juara njak belakang tu bak," Yung ye polos masih bingung.

"Ai pokoknye juara Yung, die penting tu ade kata juaranye," uji Pak Beluk agi.

Ndengar lakinye ndik becus nunjuki anaknye, Ndung Yung bini Pak Beluk langsung tegauk dan ngatei Pak Beluk.

"Hui Bapang Yung, amun bigal jangan cak icak calak. Amun njak belakang tu bukan juara namenye, tapi paling bigal," Ndung Yung mipir saje ngicik.

Ndengar Ndung nye ngicik luk itu, Yung Pantit langsung tetawe ngakak.