Kalah Pikat

Ceritenye Pak Beluk ngah Merin ni ndak ke kebun. Lah nyiapkah ranggian kah ndik berangkat, paling utame burung jangan sampai tetinggal. Burung ni bulih dikatekah cengki bebunyi alias burung murai.

Senampur Merin lah siap berangkat jengkuk Pak Beluk.

Merin ni ceritenye dik sengaje bawe burung pule, padahal dik janjian. Anye sayang burung Merin ni tekecik agi, besaklah burung Pak Beluk alias burung kecici.

Lum lame langsung pegi nuju kebun Pak Beluk. Tujuan ke kebun ni ceritenye ndak nulung Pak Beluk deres karet. Anye sate nginak burung murai ndik Pak Beluk lah bebunyi. Ndik Merin luk itu pule, same-same nyaring.

Rupenye same saje pikiran Pak Beluk dengan Merin ni.

"Mang luk mane ame kite urung deres ni, ame kate ku kite mikat kiah. Karne ngape luk kah berezeki kite ni kele," kate Merin ngicik ngah Pak Beluk.

“Semegi nian Merin pikiran kite tu. Aku pai ndak ngicik urung deres, anye kaba lah dulu ngicik, ame luk itu malah kite mikat," jawab Beluk dengan pikiran same.

Singkat cerite lasung mikat Pak Beluk ngah Merin. Tanpa pulut alias dik bepulut, cuman ngandalkah burung due tu yang bebunyi.

"Luk mane kite ni mang, cuman burung nilah ngah pisau dalam tas yang kite bawe ni, bahan utamenye pulut ndik dibawe," kate Merin agak bingung.

Singkat cerite, Pak Beluk nyubuk pulut di pondoknye. Alhasil ade, tanpa bepikir panjang lah diterai dan berape menit kemudian nyangkut di burung kecici Merin.

Dan lah petang hari, ndik Pak Beluk dik bedie dapat. Merin lah dapat 2 ikuk.

"Jadilah ame burung besak alap, anye kecul juge. Lemak lah burung kecik nilah, puk kecik anye bebise care mainnye, haha...," ragam Merin sambil nyindir.