Kulahan Akap

BELUM lame ini, Merin tekinak Pak Beluk sedang jemurkan pakai di samping ghumahnya. Sambil jemurkan pakaian Pak Beluk tulih kiri kanan manjangan. Kenan takut kalu tekinak Merin dengan Ujang Kricup, kalu ketahuan due kantinnya pasti jadi kulahan waktu ngumpul. Kebetulan nian, jendile kamar Merin ini tepat ngadap samping ghumah Pak Beluk. Waktu Merin bukakah jendile pas Pak Beluk sedang ngampaikah pakian.

"Cacam, matik kabah Pak Beluk, viral foto dengan video kabah ini kele di grup," kate Merin sambil videokan Pak Beluk.

Merin sambil ngezoomkan camera hp ke arah Pak Beluk bejijih "Kalu adi sanak, kawan kantin saksikanlah kalau jeme takutan dengan bibai. Padahal mustahil lanang sebagai kepale ghumah tangge ngampaikah pakaian dan ragian bini. Sementare bibainye duduk main hp di dalam ghumah. Kecul nian ini".

Ngerase bukti untuk ngerejei Pak Beluk lah cukup, akhirnya Merin keluar ghumah sambil mantau Pak Beluk.

"Oiii kawan, aman," kate Merin sambil tetawe.

Pak Beluk sedang ngampaikah baju tekenjut nginak Merin.

"Aman kawan," kate Pak Beluk salah tingkah sambil kisit ke belakang model ndalaki sesuatu.

"Ape didalaki kawan," tanye Merin.

"Ndalak belalang, anak ayamku kurus dide galak makan," jawab Pak Beluk.

"Udelah ce, ampaikahlah kudai baju tu, kalu busuk hembaunye kele,” kicik Merin sambil ketawe.

"Asal saje kabah ngicik ve, lanang aku ni," balas Pak Beluk.

"Semegi ce, anye bedanye aku ni lanang nian. Dide diperintahkan ndung sianu ngampaikah pakaian. Kabah tu sebenarnye ukan kalah dengan bini, anye dide ade kulahan akap saje," sindir Merin.*