Buyan Turunan

PAK Beluk lah purik nian, sebab tiap petang Yung Pantit ni musingkah utak. Sebab, antak magrib die sibuk dengan Hp piut. Bahkan anak semate wayang Pak Beluk ini dide udim musikah HP kalau ukan data habis. Pak Beluk masih saje bejijih dengan anaknye supaye dide musikah Hp majangan.

“Udimlah Yung musikah Hp terus ini, dide mbuat pintar kalau nonton saje tu,” kate Pak Beluk senai.

Sambil mendam Yung ngimpani Hp di bawah bantal kursi, udim tu die njawab “Au bapang, anya aku ini ukan nonton saje. Aku tu belajagh di Hp tu, anye ukan materi di sekol”.

Sambil bemuke agak dimanis – maniskah Pak Beluk njawab “Udimlah kabah ngeles terus tu Yung. Itukan alasan kabah saje, supaye bebas main HP. Mendingan belajar Yung, kinaki jeme banyak ni. Kalau pintar ceki bakal banyak badah jalan kerje nantinye”.

Nyintung ndung Yung “Inilah kabah ni bapang Yung, anak ngicikah sebenaghnye masih dikiciki manjangan. Kan lah dikicikah Yung, die tu belajagh di Hp, anye ukan materi sekolnye. Mase kabah dide keruan, nampak ige dide sekol”.

Dapat dukungan ndungnye, dengan semangat Yung nimbal “Au nian bapang, aku ini keruan mane untung dan rugi”.

Nganing lah nyerang die gale Pak Beluk ngangat “Oiii musikah Hp itu buyan, ukan tepintar. Cak pacak nian kamu due beranak ni, sesuai anak melawan model ini. Inilah kalau nurai ndung sibuk facebook seaghi angat. Bepikir kudai, jeme kini terus belajar, kalau pacak mbuat bom pacak kerje. Kalau model kamu bedue ni anya pacak mbuat ban saja. Karena utak itu bange, anak salah masih saje dibela. Jangan jadi buyan turunan”. *