Lemak Nian

BELUM lame ni Pak Beluk mbataki kance lamenye Sema'ul pegi ke kota besak.

Singkat cerite, pas sampai di kota besak tu, Pak Beluk langsung ngajaki kancenye tu makan di warung.

Pas lah makan, Pak Beluk bingung ngape sangkan kancenye ni dide ndak makan kerupuk sambil makan nasi.

"Ui ce, ngape kaba dide ndak makan kerupuk sambil makan nasi ni. Cubelah kudai, lemak tegale kerupuk ni amun di jadikan ulam makan," kate Pak Beluk.

"Dide eh, kele balak amun aku lah cube kele," timbal Sema'ul.

"Ai cubelah kudai, ngape pule balak," Pak Beluk maju mbujuk kancenye.

Singkat cerite agi, pas dicubenye ngan Sema'ul, rupenye lemak nian makan ulam kerupuk tu.

Saking lemaknye, laju ncandu kenan makan ulam kerupuk. Sampai makan segalenye pasti ulam kerupuk.

Ye parah nian agi, pas makan es krim Sema'ul masih kilah ndak pakai ulam kerupuk.

"Ui ce, lah gile pule kaba ni. Ke ngengape makan es krim masih kilah pakai ulam kerupuk kapuh," Pak Beluk lah kebingungan nginak perembak Sema'ul.

"Ui lemak nian ce, cubelah kudai amun kaba ndik percaye," kate Sema'ul.

"Ai dide beres kaba ni. Lah gile nian kaba ni amun luk ini. Melah balik saje kite. Kalu tambah gile kaba amun lame mendam di kota ni," Pak Beluk ye lah maluan nginak perembak kancenye tu.