Ndak Cerai

Kemaghi Ujang Kericup lah murkah nian ngan bininye. Karne merase dide tahan agi, Pak Beluk tepikir ndak cerai ngan bininye.

Anye karne dide paham nian luk ape care jeme ngurus cerai, Ujang laju tepikir dengan kancenye Pak Beluk.

Singkat cerite, pas sampai di rumah Pak Beluk, Ujang langsung ngicikkan keluh kesah dan tujuannye bahwe die ndak cerai.

Anye nginak gelagat Ujang ye selame ini memang agak lain, Pak Beluk langsung marah dan betanye ngape sangkan Ujang sampai minta cerai ngan bininye.

"Ui, tape die ngaruh kaba, lah gile base kaba ni Ujang. Tape die alasan kaba sampai ndak ceraikan bini," Pak Beluk langsung marah ndengar cerite Ujang.

"Dide nian tahan agi aku ce," kate Ujang agi.

"Awulah, ndik tahan agi tu ngape, tape sebabnye," Pak Beluk tambah pusing ngan kancenye sughang tu.

"Lah sebulan ni bini aku tu maju ndatangi badah karaoke," kate Ujang mulai jujur.

"Astaga, bebenar kudai ce, ngape sangkan pacak luk itu. Setahu aku dide luk itu bini kaba tu. Lah ngeranyam kerje kaba ni," kate Pak Beluk tekejut ndengar cerite Ujang.

"Yak bukan luk itu, bini aku tu maju nyusul aku di karaoke. Bene jadinye aku. Tiap aku pegi ke badah karaoke pasti didatanginye ngan bini aku. Makenye aku ndak cerai saje," Ujang cerite panjang libagh.

Ndengar cerite Ujang luk itu, Pak Beluk langsung naik pitam dan marah besak nian.

"Wai kaba ni nian ye lah gile. Ndik waras agi base kaba ni Ujang. Baliklah kaba ni. Amun sampai tedengar ngan aku kaba masih pegi bada karaoke, atau sampai kaba nyeraikah bini gegara itu. Kaba ni ye ku bunuh kele. Ude laratlah kaba njak sini," Pak Beluk marah nian ngan kawannye tu.*