Ngitung Umur

Udim mandi petang kemaghi, Ndung Yung duduk sebelah lakinye Pak Beluk sambil berias pakai kosmetik.

Singkat cerite, Ndung Yung tepikir ndak betanye ngan lakinye tentang umur die amun dikinak njak di muke.

"Ui Bapang Yung, cube kinak kudai mungke aku ni, menurut kamu lah berape umur aku amun di kinak njak di muke," tanye Ndung Yung.

"Nah ke ngape nian kamu nanyekan titu Ndung Yung," timbal Pak Beluk sambil maju fokus nonton TV.

"Ui itulah kinak kudai sini. Cube kamu tebak kudai amun penginakan kamu lah berape umur aku ni amun njak penampilan," tanye Ndung Yung agi.

Ndengar itu, Pak Beluk langsung nginak ke arah bininye sambil kelelenyum kecik.

"Luk ini, amun aku kinak njak di kulit, kamu tu mbak ini beumur 20 tahun, amun dikinak njak rambut kamu tu beumur 18 tahun. Tapi, amun dikinak njak penampilan, kamu tu beumur 25 tahun," kate Pak Beluk.

"Nah, bebenarlah kudai. Gi budak nian aku tu amun luk itu," Ndung Yung langsung riang ndengar jawaban lakinye.

"Kudai anye, aku ndalaki kalkulator kudai," uji Pak Beluk agi.

"Mangke ndak ngape pule dengan kalkulator tu," Ndung Yung bingung.

"Aku tambahkan kudai," kate Pak Beluk njelaskah.

"Ui awu gila amun luk itu," kate Ndung Yung ndik sadar ngan kicikan lakinye.