Sare Nian Tubuh

PAK BELUK lah 2 hari ini sakik gigi, makanan nasi lah dide pacak agi. Sehingga nguyah giginye sakik luar biase, rerasenya rase gusinye dicucuk dengan besi. Karena dide pacak makan nasi dengan gulai, Pak Beluk minta masakah bubur dengan ndung Yung Pantit. 

"Uii ndung Yung, tulung kudai masakan aku bubur. Anye agak masinkah dikit. Dide makan ige aku due aghi ini," kate Pak Beluk.

"Bubur nasi ape bubur kacang padi," tanye bini Beluk.

"Bubur nasi agak masin dikit awu," kate Merin.

"Awu," jawab ndung Yung.

Karena ndung Yung ini agak pekak, kate agak masin ini tadi dianingnye campur gule abang dikit. Singkat cerite bubur pesanan Pak Beluk lah jadi. Ndung Yung langsung mindahkan bubur ke makok kace untuk Pak Beluk.

"Lah masak buburnye, makanlah inak dalam tudung," kate ndung Yung.

"Awu," jawab Pak Beluk.

Sangkik lah laparnye, karena 2 hari dide makan ige. Pak Beluk langsung ke dapur ngingkapkan tudung. Akhirnya bubur ini tadi dimakanlah. 

"Astaghfirullah, kerbai aiiiik. Luk mane ini, aku minta masakan bubur nasi agak masin. Ngape rasenye ini manis, kabah campur tuape bubur ini," tanye Pak Beluk sambil mekik.

"Kate kamu tadi campur gule abang dikit, mangkenye manis bubur ini," jawab ndung Yung.

"Aiiii cacam. Nyimpan bini buyan pekak pule, sare nia tubuh ni. Ukan agi makan hati, kah matikan aku cepat kabah ni ndung Yung," ratap Pak Beluk.