Kawan Gelap

MALAM kemaghi Ndung Yung bini Pak Beluk nangis sambil marah-marah dengan lakinya. Penyebabnye karne Pak Beluk dikicikan selingkuh.

"Lah ndik nian beati agi kamu ni Bapang Yung," kate Ndung Yung sambil maju dedisut nangis.

"Adak nengape tini Ndung Yung. Tape die idar jijihan kamu ni," timbal Pak Beluk bingung.

"Udimlah pule Bapang Yung, banyak ige cerite kamu. Baseka kamu tu selingkuh, keruan ngan aku," kate Ndung Yung marah sambil belinang air mata. 

"Ui asak galak kamu ngicik ni. Njak sape kamu keruan kicik kelah. Jangan pacak ige ngicik," timbal Pak Beluk sambil marah.

"Udelah ui, lah banyak tetangge kite ni nginak kamu sedang mbataki betine ngarah ke pantai," Ndung Yung maju becerite sambil nangis.

"Ai cacam ai, itu lah kamu tu nide dipikir agi sebelum ngicik. Amun kamu ndak keruan betine itu kawanku kerje beaghi-aghi Ndung Yung. Kawan satu profesi. Jangan percaye ige ngan kicikkan jeme," uji Pak Beluk maju ngelak.

"Ui luk itu, bukan selingkuhan bearti," uji Ndung Yung riang ndengar jawaban lakinye.

"Ukan. Anye die tu kawan gelap aku saje," kate Pak Beluk jujur.

"Awu ngenian amun itu. Sebab, kamu kan rajin kerje malam kan," Ndung Yung percaye nian dengan kicikan lakinye.

"Yak awu bai luk ape kamu ni. Itulah jangan galak ige idar jagat angat ni ndengari kicikan jeme," kate Pak Beluk ngiciki bininye.

"Awu maaf nian amun luk itu namenye," Ndung Yung langsung minta maaf. 

"Aii bahaye nian cube-cube bemain api ni. Dide tebakar ghumah, tebakar kebun. Betul nian kate kance ku ye ngugal tu ternyate," kate Pak Beluk dalam hati.