Betemu Kerbau Gile

Belum lame ini Pak Beluk nunggui jagung di kebun atas perintah ndung Yung Pantit. Amen urusan jage lah biase saje, lah makanan sehari-hari. 

Tapi amen urusan betanam jagung luar biase bagi Pak Beluk. Die de ndak amen urusan nanam cukuplah ndung Yung Pantit saje.

Tapi kalau urusan jage sampai panen itu aman de ade hambatan lagi apelagi sambil jage kebun jagung sambil merebus pule, ceki tambah mantap.

Singkat ceritenye. Belum lame nunggu jagungan, Pak Beluk kedatangan tamu istimewah, hanye saje tamu nyeni beketing empat besak keitaman pule.

Saking besaknye, pondok Pak Beluk ampir same besaknye dengan kerbau. Anye tamu nyeni ngerinam nginai Pak Beluk. Dalam ati Pak Beluk ngape ngerinam kerbau itu, biasenye lah begasak makan jagung tapi ngape die nginai kenan saje.

Dalam ati Pak Beluk kalu ngajak belage kerbau ini, ceki de kah menang lawannye. Badannye besak panjang pule.

Belum lame mulai kerbau nare ngejar Pak Beluk, mulai Pak Beluk siap belaghi terjun saje jak pondoknye. Singgenye de keruan agi mane jagung diterabas gale dengan Pak Beluk.

Kebun jagung lah alap nihan tu besegai peci Pak Beluk dengan kerbau besak itam tu. Anye Pak Beluk de berenti belaghi ngidari kebun jagung dan iluak itu pule kerbau tu.

Pas lah terakhir Pak Beluk melumpat ke sungai pinggir kebun dan melumpat pule kerbau besaktu. Ai cacam kate pak Beluk begumam sughang, ngape kerbau ni ndak makani akuni.

Belum lame sampai kancenye Merin.

“Ngape Pak Beluk belaghi saje kukinak jak tadi?” uji Merin

“Itu Merin kerbau besak panjang itam pule ngejar akuni,” jawab Pak Beluk.

“Ai cacam bukan kerbau biase itu Pak Beluk, kerbau gile itu. Mela kite naik batang mangke de pacak agi die ngejar,” uji Merin

Lah dipucuk batang lah lame juge, mpai kerbau tadi pegi.