Duse Ndik Bebunyi

Belum lame ini Pak Beluk dengan kancenye Merin makin sukses saje. Kedue lanang yang begitu  terkenal dari masa ke masa, makin selalu tampil dengan kepandaiannye kalu urusan bisnis.

Kini makin sukses dan makin terkenal sejak pesta demokrasi tadi kini lah pakai gerude alap Pak Belukni, gerude lame lah diparkirkannye. 

“Merin, amen neman pesta demokrasi dukung medukung calon ceki tambah tajir saje kite bedueni,” uji Pak Beluk

“Au nihan katemu Pak Beluk, tapi jangan bejalan sebulan ke depan, bakal tejual gale gerude kite alapni,” timbal Merin

“Au nihan Merin kate mu itu, lagi pesta-pesta milih nila kite betanci juge. Kalau dide lagi tejual pule gerude alapni, balik gerude lame lagi,” timbal Pak Beluk

“Betul nihan kate jeme banyakni, amen jadi tim sukses tambah sukses saje pacak dapat gadis peci gerude alapni,” kate Merin

“Ia Merin lah gadis mainan ni mpai nemu tanci banyak,” uji Pak Beluk agi

“Anye kalu salah kiteni Pak Beluk, tanci sekarung jak dengan jemeni disimpan gale, kalu beduse pule,” timbal Merin

“De ngape Merin, amen duse tu ndik bebunyi, amen gerude alapni bebunyi, bum,bum,bum, bum,” uji Pak Beluk sambil gas motornye alap

“Betul uji mu Pak Beluk amen ade lain kali, pesta milih-milih ini kite pecikah nian pacak beli helikopter, mangke pacak belayar jauh juge,” saran Merin

“Mantap nihan itu Merin, aku amen lime tahun agi ndak beli bakso bebanyak, pacak dibagikan dengan jeme banyak mangke dapat pahale besak,” timbal Pak Beluk sambil tetawe. (man)