Care Jitu

PAK BELUK bingung, sebab kerje kenan sampai kini dide dikuasi dengan jelas. Semingge setiap aghi kenan selalu ditanyei bosnye. Tampaknye Pak Beluk ni bebal nian dalam urusan pemahaman kerje, padahal kenan lah nahunan kerje ye itu – itulah. Semingge jeme yang nanyei Pak Beluk lah bingung pule. Tape agi ye diupayekah supaye Pak Beluk paham, lah bebagai care agi supaye pacak dipahami. Sementare Pak Beluk cak adak saje dengan urusan kerje, setiap kali disampaikah selalu ngicik anya salah dikit itu bos. Seminggenye mbuat  mbingungkah, sementare kah keras nian jeme bedue tu bekantin.

“Oii bapang Yung, aku lah pusing ngajari kabah ini care kerje ini. Tapi kabah masih saje salah terus, tape die kendala kabah,” tanye kantin Pak Beluk.

Sambil lelinyum Pak Beluk njawab santai “Aku tu salahnye dikit agi, dide berat nian kesalahan itu ce”.

Kantin Pak Beluk mendam saje, udim tu kenan nyahut “Anye walau dikit agi salah kate kabah tu, masih salahkan? Jadi tolong rubahi dikit, jangan ladas nian kabah kerje. Jangan yang penting udim, pikirkah juge jeme ye ngurusi kerje kami kele”.

Agak mendam Pak Beluk, udim masih saje die ngeles “Au kele aku rubahi dikit, senai saje kawan. Terimelah kabah kele alap gale kerje aku”.

“Tapi kicik kabah terus itu saje, anye dide ade buktinye. Ye udim aku tunjuki itu yang lah alap, beberape aghi kele berubah salah agi. Jadi lukmane titu ce, kabah itu dide masukah ke ati kerje,” kate kantin Pak Beluk serius.

“Tenang saje kantin, udim ini kah alap nian kerje aku. Tenang saje kabah, terimelah beres gale ape ye kabah sampaikah itu,” timbal Pak Belukl PD.

“Kalau ku pehatikan kerje kabah terus beghubah ini, pakai care jitu nian,” kate kantinye.

“Tape itu ce,” sahut Pak Beluk serius.

“Care jitu kabah kalau disampaikah model inilah, cak gile atau cak ngenggile. Semingge aku ye pusing dewek,” sahut kantinnye litak.

Sementare Pak Beluk hanye nyenyengir saje.