Salah Gale

PAK Beluk duduk santai sambil ngudut ngah ngupi di berade ghumah, tetibe ndung Yung datang gegupuh sambil mbatak HP. Sebab ade jeme nelpon, anye dide ade nama di HP lakinye. Ndung Yung curiga, kalu tine ye nelpon ini.

“Angkat kudai, spekerkah. Aku kah nganing, tine ape lanang ye nelpon kabah tu,” kate ndung Yung tegas.

Pak Beluk ye tadi santai agak tekejut, supaye dide perang dunie ketige Hp langsung diangkatnye. Bahkan diajak Pak Beluk video call nian. Anye jeme ye nelpon tu dide galak video call. Hanya nelpon Wa saje. Tapi memang betine ye nelpon tu “Hallo pak kami ini nawarkah produk pertanian. Syaratnnya bapak kirim NIK dan foto KK”.

“Oiii udimlah pule, kabah tu kah nipukah. Udimlah, ndalaklah pule duit halal. Walau jeme dusun kami ini paham kabah kah nipukah,” tegas Pak Beluk.

Ngkinak Pak Beluk cak serius nian itu, ndung Yung curiga. Dalam atinye ukan jeme ini bersandiwara saje, supaye dide diketahui die. Mase jeme njak perusahaan nawari alat pertanian ke lakinye. Ndung Yung mulai purik “Udelah bapang Yung, kabah itu besandiwara dengan tine itu. Ukan jeme perusahaan kapuh itu, akal – akalan saje. Supaye aku dide curiga dengan kerje kamu bedue”.

Bingung Pak Beluk, kenan jelakah “Oiii, aku ajak video call tadi die dide galak. Jadi pasti ade dide beres, aku dide kenal betine itu. Nomor telponnye saje dide ade di Hp aku”.

“Itu alasan kabah saje, sini aku telpon nomor tine itu kele. Sini Hp kabah, biar kele aku telpon balik agi,” tegas ndung Yung.

Agak panas palak Pak Beluk “Oiii bange, itu jeme kah nipu. Kele kene bajak gale identitas kite seghumah ini. Balak besak kalau pakai jeme minjam duit online”.

“Udelah, alasan kabah. Itu pembenaran saje, supaye aku dide nelpon die,” kicik ndung Yung masih nderudut ngicik.

Marah nian Pak Beluk, sambil mbantingikah gelas kupi kenan ngicik  “Oii kabah, aku ini serius. Ukan memain, bingung pule dengan kabah ini. Salah gale aku, aku ngicik serius dikatkah memain”.

Nginak lakinye lah ngamukk, dalam ati ndung Yung “Senian ini, mendam saje. Ceki kalau masih njawab kusi terbang kele”.