Lage Punggung

lage punggung akap kemaghi ndung yung bini pak beluk semamam saje marah-marah dide jelas pas balik njak belanje di pasar. karne lah bene dan kepekakan muni bininye ye marah dide keruan acung. pak beluk laju betanye tape sebab sangkan ndung yung maju bejijih tu. "hui ndung yung, tape die kamu mumuti ni, setu balik bejijih dide keruan acung agi," tanye pak beluk. "entah bene aku, kinaklah hp aku tu lah pecah gale layarnye," timbal ndung yung. "yak ngape pule sangkan pacak pecah gale. jadi gegara tinilah kamu ni bejijih ni tadi," kate pak beluk. "awu, keruanlah aku inilah be hp alap, mangke lah pecah gale," timbal ndung yung agi. "mangke luk ape pule sangkan pacak pecah tu," pak beluk ngulang betanye agi. "tadi umban pas di jalan. awak padahal tulisan mode pesawat lah aku idupkah antak bejalan tadi," ndung yung njelaska. "mangke tape hubungan die mode pesawat ngan hp umban," pak beluk tambah bingung. "yak, namenye saje mode pesawat, bearti hp tu pacak terbang aseku. ade ini satu umban langsung bedepar ke aspal. pecah galelah hp. dide beres hp ini," ndung yung maju bejijih. "ai cacam ai. amun itu bukan hp ye dide beres, anye kamu tu ye dide beres," pak beluk rengam. "mangke tape die maksud kamu bapang yung," ndung yung tambah marah. "ui baseka mode pesawat di hp tu bukan mbuat hp pacak terbang. tapi batan matika segale koneksi di hp tu," pak beluk njelaska. "ui luk itu gunenye tu. empai keruan aku. hehehe," jawab ndung yung sambil nyengir kecik luk ndik besalah.  “ai kerbai, cukah kicikan dide mbedal. pacak sebulan agat ni lage punggung,” kate pak beluk bemumut sambil kisit.

Tag

Share

• 
• 
• 
• 
•