Ngabisi Jatah

ngabisi jatah belum lame ini pak beluk sakit peghut, lah idar beubat belum juge sehat.  karene lah nyagu beubat, pak beluk betanye dengan kancenye merin "aku ni lah lame sakit peghut, tape batan ubatnye". "sebenarnye amen sakit peghut itu biase, gegarenye neman makan," timbal merin. "yak, mase model itu merin, peghase kabah galak pule makan banyak," jawab pak beluk. "au pak beluk, anye kalau makan banyak sakit pule peghut aku ni," jawab merin. "jadi nurut kabah makan banyak sakit peghut. jadi obatnye makan dikit," uji pak beluk. "itu sementare kabah sakit, kele kalau ngudim bidapan makan banyak agi. normal model dulu kance," timbal merin. pas pule ade acara tetangge merin. ngape pule pas acara merin dengan pak beluk bedampingan duduk.  "ingat pak beluk, kabah bidapan sakit peghut. nasi kabah makan cukup ujung sendok saje. kabah belum sehat nian, anye waktu ngambik nasi dan gulai daging kele bebanyak. biar aku ngambik di ajang kabah tu," uji merin. "jadi merin aku makan dikit saje, jatahku ambiklah gale. gulai daging sampai ulam petai ambiklah gale. anye kah ghadu nian sakit perut aku ni kele," timbal pak beluk. "cube lah kudai, ubat akuni manjur," uji merin. pas lah makan merin mantak jatah pak beluk. lap delap kenan makannye. pak beluk cuma tecengang saje, nginak merin makan ini mulai teghase ade dide beres. sebab kate merin kalau banyak makan sakit peghut, anye merin pasang udim makan. bahkan ngabisi jatah jeme lain, pasti ini modus. belum lame makan pak beluk ngicik dengan kantinnye "merin, ngape tambah sakit perut akuni”. "yak pak beluk, makan kabah ni dikit nian pule. pantas saje sakit peghut kabah, lapar itu," timbal merin. "katemu ubat sakit peghut makan secuil," jawab pak beluk. "belum ade sejarahnye makan secuil ubat sakit peghut pak beluk, amen ndak beubat ke dokter mangke keruan penyakit," uji merin sambil dedepus ngudut kekecangan.  “aiii mbudikah kabah ini, kabah ngicik makan dikit tadi karene kah ngabisi jatah aku. mbuyankah nian kabah ni, kalau ukan di jeme ghami. lah aku dagurkah pale kabah ni,” kate pak beluk emosi.*

Tag

Share

• 
• 
• 
• 
•