Bedentum Bedecis Pule

Belum lame ini suara bedentum besak bedecis pule di rumah Pak Beluk. Sempat Pak Beluk dengan ndung Yung Pantit melumpat ke luar rumah. Suare meletup jak kaling kerdincis amen basenya. Iluak ini singkat ceritenye.

"Mpaini tepakse belaghi ke luar rumah dengan ndung Yung Pantit pule," uji Pak Beluk.

"Ngape belaghi Pak Beluk, ape sebabnye?" timbal Merin sambil dedepus ngudut.

"Ade nihan, ndak ngujikah panggangan ikan," jawab Pak Beluk.

"Ngape pule manggang ikan belaghi ke luar belum pernah tejadi iluak itu," timbal Merin.

"Au nihan nampaknye salah carenye, biase lah tue begawe laju kecul," jawab Pak Beluk agi.

"Ngape pacak salah tu Pak Beluk, iluk mane care bakar ikan tu," timbal Merin.

"Ikan tu dalam kaleng amen base kami kerdincis, amen kerennye sarden. Aku panggang undak kaleng tu, belum lame meletup bias bedecis pule," kate Pak Beluk.

"Salah nihan kaba Pak Beluk, bukan panggangan sarden bekaling itu, de kene letupannye pacak micut," jawab Merin.

"Au Merin, lain kali de ndak lagi aku panggangnye kalu bunuh, same iluk bom," timbal Pak Beluk.

"Au nian Pak Beluk, amen bias juge bunyi nye, pacak nakuti jeme galak mibar de keruan acungni," uji Merin sambil malis.