Ubat Ghibut

PAK BELUK belum lame ini beribut besak dengan ndung Yung Pantit gara-gara neman main game slot. Pak Beluk lah pening, hutanglah besak pule.

"Ngape ribut saje Pak Beluk dengan ndung Yung," uji Merin.

"Biase olahraga main mulut, lah lame dide diujikah," timbal Pak Beluk.

"Kabah beribut siang malam, pasti ade ye salah itu ce," jawab Merin.

"Au nian, biase lagi pening banyak pengeluaran," timbal Pak Beluk.

"Ape pule pengeluaran kabah tu," uji Merin agi.

"Biase main game slot, rugi besak," timbal Pak Beluk.

"Ai rusak kabah kalau mbak itu, pantas bini kabah ringam," jawab Merin.

"Kini lah mulai tobat, mangke dide ribut agi," kesal Pak Beluk.

"Ngape pule pas ribut kabah ngicik dide dapat tujah siang, ku tujah malam. Agak ngerio aku kate itu madake," kate Merin.

"Nduk kabah. Nganing gale kabah ape  ye aku kicikah dengan ndun Yung waktu ribut tu ce, " uji Pak Beluk.

"Au, semingge aku penasaran.  Tape dide tujah ini,  aku jadi kep;;o kate jeme mbak ini tu,"  sampai Merin. 

“Yak mase kabah dide keruan, tujah itulah ubat ghibut dengan jeme ghumah ce. Kite ye ribut, kalau jeme due tu dide ribut,  anye walau dide ribut masih betujahan tulah,” kate Pak Beluk lelinyum.

“Aiii kabah.  Ligham utak tulah kabah ni,” kicik Merin sambil putar badan balik.*