PAK BELUK temenung di berande, sebab jauh nian rupuk kenan. Akap tadi ke kebun, ngkinaki kebun pisang. Sayang sampai di kebun, buah pisang lah habis gegale dimakan beghuk kapuh.
Keciwe nian kenan, hasil ye selame ini diharapkan kandan dihambisi beghuk. Sedang duduk behayal tetibe sampain Merin, die nginak Pak Beluk tebadai. Anye belum tahu ape masalah kenan ini.
“Pecaknye dalam nian pikiran kabah tu bapang Yung, ade ape. Akap tadi ke kebun kabah, petang ni nampak sedih,” tanye Merin.
Nimbal Pak Beluk “Ngape dide sedih ce. Selame ini kebun pisang aku dirawat nian, giliran lah bebuah lebar gale dimakan beghuk”.
“Oooo itu masalah kabah. Jangan dipikirkah nian, rawat anaknye sampai mbuah agi,” kate Merin senai.
Tekejut Pak Beluk jawaban kantinnye ini. Kenan njawab “Yak masih lame ce. Tapi aku penasaran dengan care kabah njawab senai ini, ade ape”
“Oiii bapang Yung, wajar buah pisang kabah lebar gale dengan beghuk tu. Ditunggu dide, kebun parak ghimbe. Wajar digasak beghuk, mase kabah dide tepikir. Jangan urusan mbak itu diserahkan dengan tuhan,” timbal Merin.
Pak Beluk tejut agi, anye dalam ati kenan penasaran sikap Merin ini. Pak Beluk bertanye “Mase oii tuhan dide kesian, kan die pacak ngatur gegale makhluk di bumi dan langit ini”.
“Naaa giliran sare kabah ngicikah tuhan manjangan, anye giliran sedang lemak kabah lupe tuhan. Bahkan galak mbudikah tuhan, contoh hasil ngetam kabah dapat 100 kaleng kabah kicikah 80 kaleng. Mbudikah itukan, hanye supaye dide keluar zakat. Itulah sadar dikit bapang Yung, kerje ini disesuaikah, tuhan tu tahu gale kerje kite ini ce,” tutup Merin sambil kisit.