Kemaghi Pak Beluk di telpon kance lamenye Merin. Kebetulan, Merin ni ade nian ye ndak di ceritekah dengan Pak Beluk.
Singkat cerite, pas lah diangkat telpon tu, Merin dide basah basi lagi langsung becerite dengan Pak Beluk.
"Anu ce, aku tadi besak nian dapat ikan nggaring. Lemak nian di gulai tini," kate Merin semangat nian.
"Besak mbak mane pule ce," tanye Pak Beluk penasaran.
"Besak nian pokoknye ce, lemak nian mancingnye tadi," Merin maju manasi Pak Beluk ye lah lame dide dapat nggaring amun mancing.
"Laju ndak nyombong nila kaba ni nelpon aku ni," Pak Beluk ngulang betanye.
"Ukan ce, aku ni ade ye ndak ditanyekah dengan kamu," Merin balik betanye.
"Ndak nanye tape agi kaba," Pak Beluk lah mulai panas.
"Menurut kaba, kekire diapekah ikan ni mangku lemak," Merin betanye serius.
"Amun aku, amun ikan nggaring ye masih idup luk itu lemak digulai pedaskah adak tu disopkah," Pak Beluk jujur nian.
"Ai salah nian kaba tu Bapang Yung," uji Merin.
"Salah tapenye," Pak Beluk mulai rengam.
"Yak salah lah, pasti ikan tu mangke lemak diluputkah agi. Amun digulai adak disop tu mangke kaba lemak. Akun kan betanye ikan tu diapekah mangke lemak," Merin njelaskah panjang libagh.
"Ai mati gancang ai. Ude teguklah nian ikan tu bajang. Jangan agi kaba ngubungi aku senaun," kate Pak Beluk sambil langsung nutup telepon. *