Tejebak Lemak

MERIN belum lame ini bedebat dengan Pak Beluk, semingge due bekantin ini lagi dide setegoran. Seminggenye lah due minggu due sekantin tu sepalisan muke ketike betemu, padah asalnya dide besak. Hanye karene Pak Beluk diingatkah Merin waktu ngobrol di badah jeme bekagukan. Kejadian due sekain ini diketahui Ujang Kericup, semingge jeme bedue tu dipanggil. Waktu sampai di ghumah Ujang Kericup Pak Beluk tekejut, sebab Merin lah ade di situ juge. Anye kenan lah telajur lah sampai.

“Oiii bapang Yung, lah ditunggu njak tadi kabah. Lah ade rukuk surya 16 kupi dengan guringan disiapkah untuk kabah,” kate Ujang Kericup senai.

Sambil agak muke tegang Pak Beluk langsung njawab  “Tape lukak kabah ngajak aku ini ce, lah disiapkah rukuk pule”.

“Kite langsung saje kalau mbak itu. Aku nganing kabah bedue agi dide beteguran, padahal njak lebuk kite ni sekantin. Ukan mpai setahun due ini saje, jadi ape masalah sampai kamu bedue ribut,” tanye Ujang Kericup.

Nimbal Merin “Aku kudai njawab, dide ade masalah awalnya. Anye aku lah beulang – ulang ngicik dengan Pak Beluk. Udimlah kudai ngicik bebesakan manjangan, padahal awak kerih. Sebab kite ini lah tue, maluan lelunjakan bebudak mude. Mase dide ngeghase dibuyani bebeudak, aku purik nian. Semingge aku sampaikan aku tu di badah jeme kagukan waktu main dum, anye dide secare langsung”.

“Oiii kabah, itulah aku purik. Kabah tu buyan nian, itu urusan aku pribadi. Jadi kabah dide perlu ingat- ingatkah. Udim tu jangan ngicik mbak itu nian dengan aku di badah njeme ghami,” kate Pak Beluk purik.

“Udim – udim kudai kabah ngicik bapang Yung, ape kicik Merin waktu main dom tu,” tanye Ujang Kericup senai.

“Die ngicikah aku ini besak huap saje, di segale bidang,” kate Pak Beluk dengan muke masam.

“OOOO, udim tu akuy tanye kabah bedue ini ringkas saje. Sebab kalau diungkah gale dide ngudim pehaman kite. Kini kabah bedue ini kah damai dide, kah nyadari dide. Kalau dide kah damai, kami bedue ku laporkah ke Pelesi. Sebab lah ngabisi gule kupi, guringan aku dan rokok aku akap ini,” tegas Ujang Kericup senian.

Medam jeme bedue ini, akhirnye ngicik Pak Beluk “Kami damai saje, sebab urusan kah dilaporkah ke Pelisi. Tejebak nian aku akap ini, ntah kabah Merin,” kate Pak Beluk.

“Semegi tejebak, tapi uke juge aku,” kate Merin. 

Sambil lelinyum Ujang Kericup ngicik “Anye kamu bedue akap ini tejebak lemak”.*