Tambah Kuat Iman

UDIM mandi akap kemaghi, Pak Beluk dengan bininye Ndung Yung duduk di berende depan ghumahnye.

Die due laki bini tu becerite tentang bulan puase. Maklum, Pak Beluk dengan Ndung Yung maju pule puase.

Singkat cerite, Pak Beluk ndulu ngicik tentang bulan puase tu.

"Ngapelah eh, semenjak bulan puase ni tambah kuat saje iman aku ni," kate Pak Beluk mulai ngicik.

"Nah, syukurlah amun ke ngenian acak kah iluk titu Bapang Yung," timbal Ndung Yung.

"Awu, amun bulan puase ni kate jeme kan banyak-banyak berbuat pahale dan sembayang jangan tinggal," Pak Beluk maju ngicik.

"Amun itu lah pasti Bapang Yung, kakire ye mbuat kamu ngicik tambah kuat iman tadi tape die pule," Ndung Yung penasaran.

"Anu, selama ini kan aku masih jarang sembahyang. Nah, semenjak bulan puase ni maju ndak cecepatan aku ndak sembayang," uji Pak Beluk.

"Nah padek itu," Ndung Yung riang ndengar lakinye lah berubah.

"Aeu, contohnye saje sembayang Magrib, empai jam 11 siang aku lah ndik tahan agi ndak sembayang Magrib," Pak Beluk njelaska panjang libagh.

"Yak amun itu lah idapan Bapang Yung. Bukane ndak cecepatan Magriban kamu tu, tapi ndak cecepatan bebuke puase titu," Ndung Yung rengam.

"Nah itu nyelah pule, tapi ndik salah aku tu kan," tanye Pak Beluk luk adak.

"Awu dide salah. Tapi kamu tu lah ampir mengkuau. Jadi wajar saje tingkah kamu ngulang luk budak kecik," kate Ndung Yung sambil balik ke dalam rumah.