Litak Gale

MERIN purik nian, sebab kekantinnye lah dide searah pehamann agi. Kenan banyaklah mendam kini kalau betemu dengan raban tu, sebab kenan tekesan dide senabi dalam urusan pemahaman. Nginak kantinnye terus mendam setiap bekumpul, Pak Beluk mulai curiga ada persoalan dengan Merin.

“Ngape kabah mendam terus kalau kite bekumpul ini ce,” tanye Pak Beluk dengan Merin serius.

Nimbal seadeya saje Merin  “Dide, sedang ndik mood saje ce”.

Pak Beluk makin penasaran, sebab die keruan sikap dan sifat kantin baiknye ini. Kenan langsung nanye agi “Sampaikah saje kalau ade uneg – uneg di hati kabah ce. Dide kah sungkan nian, tape die masalah dengan kabah dengan kekami ini. Dide kah tesingguh kami kele”.

Sambil senyum dipaksekah Merin njawab agi “Dide ade masalah kawan, aku sedang dide semangat saje ngicik. Teruslah kekamu ngobrol, aku tukang aning saje”.

“Oiii kabah, aku keruan kabah ini. Kite lah sekantin njak lebuk, jadi aku keruan bahwe ade ye dide pas dengan kabah. Jadi sampaikah saje, supaye kite dide ade beban,” sampai Pak Beluk.

“Jadi kalau mbak itu, aku mendam dengan kekamu ini karene banyak kesepakatan yang kite buat dide dijalankah dengan iluk. Semingge aku bepikir, bekantin cukup model ini saje. Sebab jeme ye ingtkar dalam kesepakatan itu bukti imannye lemah, mane lah dide ade betanci gale. Lukak mbak itu pule, dide kah sebagian. Jadi litak gale bekantin dengan kekamu,” tegas Merin.

Sambung Merin agi “Kalu madak saje dide ngawan kekamu ngobrol, ape agi betandang ke ghumah aku.

Sejujurnye aku tepakse ngawan kamu gegalenye ini ketike betandang ke ghumah ku ini. Mane lah rugi waktu, rugi kupi aku. Sementare jeme model kekamu ini dide bedie ade tungguan kicik”.

Nganing kecik Merin peda itu Pak Beluk hanye pacak mendam saje. Sebab die teingat, memang lah banyak janji ye disepakti dide dilakukah. Awak die keruan sipat Merin ye nunggu pahaman.