Cak Icak

Reporter: Rohidi Effendi |

Editor: Daspan Haryadi |

Kamis , 01 Aug 2024 - 18:18

Pak Beluk--

cak icak                             lum lame ni pak beluk ndak mbeli motor agi batan pakaian die berhari-hari. motor ye ndak dibeli kenan ni lah ade lukaknye.
karne lah pasti dibeli motor tu kele, jadi pak beluk ngajaki lihin ngambik motor ye ndak dibeli tu.
seminggenye nempecung saje due sekawan ni pegi kota besak bada motor ndak bejual tu.
anye, pas sampai dan lah betemu ngan jeme ye ndak njualkah motor tu.
bejaju saje rombongan ni saling tawar menawar. ndik lame betawaran langsung jadi kate pak beluk mbeli motor tu.
sebab, harge ngan kondisi motor tu lah cucok dengan serile pak beluk.
"ade suratnye motor kamu ni," pak beluk betanye ngan ye punye motor.
satu ndengar pak beluk nanyekan surat motor. ye punye motor ni langsung masuk ke dalam rumah agi ngambik surat motor tu.
pas ngeluar lah mbatak map tu jeme punye motor ni.
"ini nah surat motor ni. lengkap gale tini," kate pemilik motor sambil ngejukkah map libagh.
"yak alang ke besak libagh pule surat motor kamu ni. amun peghasean aku ndik sebesak ini surat motor," timbal pak beluk.
"udim tu ngengape pule name jeme ye punye motor ni pemerintah daerah (pemda) ni. ngape dide same ngan name kaba," sambung pak beluk bingung.
"yak memang itulah suratnye," kate jeme punye motor tu agi.
"nah rusak ini. amun luk ini lum kah lasung aku mbeli motor kamu ni. sege ige pule aku mbatak surat motor libagh tegale ni dan pakai map pule. luk ape agi aku masukkan die ke dompet amun besak libagh luk ini," uji pak beluk sambil ngajakin lihin balik.
"ntuk bigal ape luk ape mamang ini tadi. lah keruan motor be plat abang. wajar saje name pemilik motor ni pemda. amun motor ni hasil lelang die," kate jeme punye motor sambil nyimpani surat-surat motor.
"ukan luk itu, amun amun kamu ndak kurang sejuta agi, melah sini motor," kate pak beluk.
"udim urung saje amun lum cocok," timbal jeme punye motor.
karne nginak pak beluk urung beli motor tu, lihin marahi pak beluk.
"buyan ape luk ape kaba ni ce. motor alap rege murah. anye urung gegara surat libagh," kate lihin.
"yak sape bai, kalu bodong motor tu. surat selibagh itu," timbal pak beluk.
"ui baseka motor tu lelangan dinas, jadi wajar suratnye luk itu. amun ndik terti betanye, jangan cak icak calak. ude melah balik," kate lihin rengam.

Tag

Share

Koran Terkait

Kembali ke koran edisi Radar Kaur, Jumat 2 Agustus 2024

Berita Terkini

Berita Terpopuler

Berita Pilihan