Nawar Bigal

AKAP kemaghi Ndung Yung (Bini Pak Beluk) balik njak pasar, langsung singgah ke bada njual buah-buahan. Kenan ni rencanenye ndak beli buah limau (jeruk).

Singkat cerite, satu sampai di bada tukang buah tu, Ndung Yung langsung milih-milih buah limau tu. Udim tu kenan langsung betanye, bulih dide ngecap.

"Manis limau kamu ni mang. Bulih ngecap dide," tanye Ndung Yung sambil maju bepilih ngan buah limau tu.

"Manislah bung, amun dide manis kele ambillah gratis saje. Kecaplah kudai mangke keruan bung," timbal tukang jual buah tu.

"Yak, bebenaghlah kudai mang, awaslah amun pembuhung kele," kate Ndung Yung sambil mbukak sebuah.

"Awu ngenian bung, belilah kudai," kate tukang buah.

"Anye beghape sekilo ni mang," kate Ndung Yung mulai nanyekan regenye. Sebab, pas kenan kecap tadi limau tu manis nian.

"Ambiklah 10 ribu saje sekilo bung," uji tukang buah.

"Yak-yak alang ke mahanye pule bai. Mase buah limau sebesak tik idung (upil, red) ni regenye sapai 10 ribu," kate Ndung Yung protes ngan rege mahal.

"Yak murah titu bung. Tape agi pule ye temurah njak itu. Udim tu bebenagh lah kudai bung. Amun ade nian tik idung sebesak buah limau ni, sini aku beli 100 ribu," timbal tukang buah kesal.

"Udim, jadilah aku beli sekilo saje. Mahal gale peregean mbak ini aghi," kate Ndung Yung.

"Ai ibung ai. Jangan bigal nian nawar rege ni. Jeme ni encari. Amun ndak murah betanam sughang," kate tukang buah bejijih.

"Nah urung saje aku mbeli amun luk itu, aku lah nanam saje," timbal Ndung Yung sambil larat ninggalka tukang buah tu.

"Ayai cacam ai. Untung kerebai lauk ni tadi. Adaknye kalu bebapuk nian kuantan ngan tinju besak setembak itu," dalam ati tukang buah. (roh)