Penting Betitel
![](https://radarkaur.bacakoran.co/upload/2be9e81bc9139a0d0b8d8d58d8e21728.gif)
Pak Beluk--
PAK Beluk tekejut, sebab Merin dikabarkah bakal wisuda ujung bulan ini. Pak Beluk ndik habis pikir, lukmane die Merin ini pacak sekol tinggi. Sebab sepengetahuan Pak Beluk ijazah SD sampai SMA paket gale. Apek dide mikir jeme di badah Merin kuliah itu, ape dide keruan Merin syukur pacak mbace nulis dan behitung. Lah dide nian sekul mbak ini, model tu pacak sarjana. Sengkat cerite kenan betemu dengan Merin. Pak Beluk lah lame nian bakal betanye urusan sekol ble ini.
“Oiii ce, lukmane ceritenye kabah lah kah wisudah. Kabah kuliah nian ape,” tanye Pak Beluk penasaran dengan Merin.
Sambil lelinyum Merin nyahut “Au nian ce, geguyur sekol tue. Jadilah buat cerite dengan anak cucung kele, walau tue masih semangat sekol”.
“Cacam, alangkah mantap pikiran kabah tu. Anye ape gune kabah kuliah itu ce, pegawai dide. Kah kerje kantor dide, ngambik sarjana tiap aghi unggat angit ke kebun tulah. Tape die gatinye, tepindat juge aku kinak dide pule,” kate Pak Beluk serius.
Agak angat Merin, kenan langsung njawab “Tape die urusan kabah dengan aku kuliah, mintak bayar dengan kabah aku dide. Ngengape kabah pusing nian, itu urusan aku. Jadi kabah dide perlu banyak kicik ce, jangan madakah nian”.
Ngenik Merin tesinggung Pak Beluk cak dide saje, kenan ngicik agi “Ukan ade urusan atau dide. Aku tekejut saje, sebab kabah dide betambah pintar. Masih pikiran ye lame tulah, semegi dengan aku paket A ini. Tapi au nian, walau pacak kulaih kabah paket gale. Ukan uluk budak sekola akap ini, kabah tu sekol bulanan”.
“Udimlah Pak Beluk, tape die gati kabah urusan aku kah wisudah. Paling kabah iri, aku kah tepintar atau dide pokoke lah sarjana. Ukan kabah hanye paket A tulah,” tegas Merin ngangat.
“Ooo, mbak itu ceritenye. Kabah tu yang penting betitel saje, ukan ngarapkah ilmunye. Wajar saje kabah ini buyan manjangan,” tegas Pak Beluk pasang udim.