Untung Lunggukan

PAK Beluk belum lame ini diajungkah bosnye ndalak kayu untuk pelapon kantor, awalnye Pak Beluk dide nian galak. Lah neman besasut rundingan, akhirnye Pak Beluk ngalah. Sebab dide madak, ye mintak ini Pakbos nian. Walau lah tahu bakal kene getah urusan ndalak kayu ini, tapi demi Pakbos Pak Beluk terus jajukah kerje itu. Singkat cerite, lah udim dibelahkan kayu sesuai pesanan Pakbos Pak Beluk. Kayu lah diantatkah ke lokasi ye dituju, sesuai petunjuk Pakbos Pak Beluk.

Waktu balik ke ghumah Pak Beluk mulai ngitung, kenan mulai cungak nunduk. Nginak kantinnye serius Merin ngicik  “Tape die kabah hitung cungak tu bapang Yung”.

Sambil lelinyum Pak Beluk nyahut “Agi ngitung urusan mbuatkah kayu pesanan Pakbos ce”.

Sambil beragam  Merin ngicik “Nampaknye besak untung tu ce, aku kinak kabah lelinyum nian”

Sambil nyengir unte Pak Beluk nimbal serius “Kalau untuk duit dide ce, sebab ini madak dide ngikut dengan keinginan Pakbos kantor”. 

“Yak, mbak mane pule titu ce, urusan ndalak rezeki itu harus pepakam. Dide nyangkut dengan urusan kantor, namenye usahe tambahan,” kate Merin cak pakam nian. 

“Naa itulah kabah, kite hidup ini wajib saling hargei, saling tulungi. Sebab kalau aku dengan Pakbos itu ukan untuk rugi, tapi kewajiban nulung. Sebab aku lah banyak ditulungi de ce, aku nulung ini dide seimbang dengan die nulung aku,” kate Pak Beluk jumawa nian.

“Tapi urusan kayu ini kabah untung dide, kalau dide ngape dikerjekah. Kalau lah keruan dide untung, tapi masih dikerjakah. Agak penting care bepikir kabah tu,” asung Mering PD.

“Itu kabah, jelas beda dengan aku. Sebab untung rugi itu due beghading, sekamar lain katil saje. Jadi dide perlu kabah puriki urusan aku ini,” tegas Pak Beluk senian.

“Ayaiii kabah, kini aku betanye. Urusan kayu ini kabah untung, tapi takut aku mintak,” uji Merin mancing.

Dengan PD Pak Beluk nyahut “Pastilah untung, aku galak ngenjuk untung dengan kabah tu. Tapi aku yakin kabah dide galak ce”.

“Oiii galak nian aku dibagi untung tu, jadi lukmane ceritenya. Lukmane aku pacak beragih untung kabah tu kawan,” bujuk Merin.

“Gampang, tinggal kabah mbatak senso kecik saje, kite ambiki jualkah. Sebab untung aku sisa belahan, untung lunggukan. Jadi malah kite garap, kite jualkah,” tegas Pak Beluk. (red)