Ngimbang

Njak due tige aghi ni, Pak Beluk maju mendam di rumah tulah dan dide ke mane-mane.

Karne rengam, Ndung Yung bininye langsung betanye dan marahi Pak Beluk.

"Ui ngape pule kamu mendam saje di rumah ni," tanye Ndung Yung.

"Ndik nginak kamu mateku ni mbengkak ade mbak sayak," timbal Pak Beluk.

"Ya, dide kah ngape nian bai amun pekare mate nila. Udim tu mare beobat amun asenye kah ngecul nian," kate Ndung Yung agi.

"Yak samelah bai. Itulah aku ndak beobat, anye dide keruan ke mane," Pak Beluk bingung.

"Yak betanye bai. Cube betanye ngan Ujang tu. Kalu dieel keruan," saran Ndung Yung.

Singkat cerite, karne lah puasan mendam di rumah, Pak Beluk langsung nelpon dan ngajung Ujang ke rumahnye.

Pas Ujang lah sampai rumah Pak Beluk, Ujang tekejut nginak mate Pak Beluk lah bengkak gale.

"Ampun nian aku ce, lag sakit gale mate ni. Bengkak gale kelupak mateku ni. Jadi maluan amun ndak ngeluar rumah," kate Pak Beluk jujur.

"Wui ade ubat mate bengkak tu ce," uji Ujanh ngejuk saran.

"Adak tape die titu. Kicik kela, lah dide tahan agi nahankah tini ni," timbal Pak Beluk semangat.

"Kaba subuk kah ke reban ayam mate kaba tu," jelas Ujang.

"Yak bebenar kudai kaba Ujang. Ubat tape die nyubuk reban kapuh," Pak Beluk marah.