Dide Kenal Bini

PAS libur sekul kemaghi, Pak Beluk ngajaki anak bininye pegi ke kota besak. Singkat cerite, pas sampai disitu, Pak Beluk langsung ngajaki anak bininye pegi ke mega mall.

Anye, karne lum pernah masuk mall, jadi luk jeme kelala nian Ndung Yung ni. Saking lum nian pernah, Ndung Yung ngajak Pak Beluk balik saje. Sebab, bini Pak Beluk ni takut peregan ye jeme juali di dalam tu mahal gale.

"Anu Bapang Yung, kateku lemak degelah kite masuk ke sini. Kalu mahal gale peregean di dalam tu. Lemak kite balik saje," kate Ndung Yung.

"Udelah pule. Melah kite nginak jualan di pucuk. Sesekali pule bai," uji Pak Beluk.

"Di pucuk ruguk mane Bapang Yung, jalan mane pule ndak naik ke pucuk tu. Kinakku dide bedie tanggenye setembak ini," kate Ndung Yung mulai bingung.

"Ai kamu, melah ngikut aku. Jangan luk jeme bigal nian ni bai," jijih Pak Beluk sambil ngajaki bininye naik tangge eskalator.

"Nduk ai, luk ape naik tini bapang Yung, ngape tanggenye bejalan sughang ni," kate Ndung Yung ye tambah bingung.

"Ayai Ndung Yung ai, maluka nian kerjean kamu ni amun luk ini ceritenye," Pak Beluk mulai marah. Anye kenan sambil bebisik saje nga bininye tu.

"Yak luk mane terti adak aku. Kele digilingnye pule ngan tangge bejalan ni," Ndung Yung tambah takut saje.

"Entah kendak kamulah ndung Yung. Amun kamu nggub ngikut tunggu lah di bawah nila. Kami ngan Yung lag kah naiklah ini," uji Pak Beluk sambil bejalan.

"Tunggu kudai uii. Digilingnye nian aku ni kele, ui Bapang Yung tulung kudai aku ni. Uii Yung, tulung kudai ndung kamu ni. Alang ke antik pule tange ini," Ndung Yung maju tegauk-gauk manggil laki dengan anaknye.

Ndengar bininye tegauk-gauk, luk dide kenel dengan bininye saje Pak Beluk. Kenan maju bejalan dengan anaknye.

"Dediam saje Yung, malukah nian ndung kaba tu. Itulah amun mendam diutan saje," kate Pak Beluk mbisiki anaknye. (roh)