Ujang Mas

Lum lame ni Pak Beluk ngikut kancenye Merin berayak ke ghumah sanaknya di Sumatera Selatan (Sumsel). Endik sengaje Pak Beluk ni. Gawih kurang wawasan gale, laju tecalup kenan.

Ceritenye Pak Beluk ni busik ngah Merin. Pas saje Merin dang beranggi ndak pegi.

“Ndak ke mane kaba lah belagak pasang udim ni?” tanye Pak Beluk.

“Ujan Mas,” jawab Merin, singkat.

“Yak...Di mane titu ce? Galak aku mikut. Kaba ni dediam saje. Engguk benagh bebagi rezeki,” uji Pak Beluk, serius benagh.

“Ndak mati kaba kali ni Pak Beluk,” dalam ati Merin.

“Adak malah ce. Beranggilah cepat,” kate Merin.

Dengar Merin ngajak, endik nganju Pak Beluk langsung balik. Jarak 10 menit lah bedepus agi nyampai di ghumah Merin. Mbatak tas ransel sikuk isi gerulun.

Endik lame berangkat due sekance ni. Pakai motor.

“Di mane pule Ujan Mas tu?” Pak Beluk masih penasaran.

“Endik jauh, lah ndak nyampai kite ni. Paling jak Sahung ni sejam agi. Anye die tu lah masuk daerah Palembang,” uji Merin.

“Ui awu ce...Lah pegal beguncing ni. Pelupuk benagh ditinggang ngah emas tu ce. Besak giape emas umban jak langit tu ce?” Pak Beluk maju betanye.

“Eh...Kaba ni banyak benagh tanye. Kele kaba nginaknye langsung,” jawab Merin.

“Ai...Bange tu endik nian betanduk. Mase Ujan Mas saje disangke hujan emas. Tulah mun otak tu gi duit tulah,” dalam ati Merin.