Pale Batu Gosok

PAK Beluk purik nian, sebab kerje di dusunye banyak nian. Anye walau diajungkah pemerintahan desa kerje, honor kenan belum kinah dinjukah Kaes.

Semingge mbuat kenan teganggu, sebab ndung Yung terus nanyekah penghasilan. Selain itu untuk beli rukuk saje lah sege nian. Pak Beluk ngeluhkan kondisi ini dengan kantin – kantinye, mintak solusi urusan ini.

“Ce aku nil ah purik nian, sebab honor kami kerje dide dinjukah Kaes. Padahal kate jeme APD kapuh lah cair. Ditagih Pak Kaes ini janji semanjangan,”  keluh Pak Beluk.

Nimbal Merin “Yak, nema itu ce. Bayaran honor kabah ye mane belum dibayar tu. Belum dibayar gale kamu raban tu”.

Sahut Pak Beluk “Dide same honor kami ye belum dibiayar Kaes. Ade  ye dua bulan, ade ye tige bulan, lebih gile agi ade ye lime bulan”.

Sintung Taun “Neman Kaes tu, tapi lukmane nian. Gaya masih jalan penghasilan litak, jadi Tuti dengan kekantin kudai tulah titu”.

Agak penasaran Ujang Kericup “Tuti mbak mane maksud kabah ce, ilu – iluk kudai ngicik ini”.

Sambil lelinyum Taun nyahut “Tukang tipu maksud aku tuti tadi, itu bahase anak gaulnye ce. Walau kite lah tue, sesekali masih penting bahase gaul”.

Pak Beluk ngicik agi  “Jadi lukmane kekire solusi njak kamu, mustahil aku ngutang di warung ngicikah mbayar nunggu honor bayar Kaes. Kalu jeme kicikah aku ye stres, awak lah agak  mulai nian bawean buntu ini”.

“Naa, bingung aku ce. Sebab keruanlah Kaes tu, mudah berasan sege jadi. Ngicik model knalpor motor, asal mbunyi, anye didekah nepat titu,” sahut Merin.

“Sege urusan tu ce, sebab pale Pak Kaes model palak batu gosok. Liut beciut pembudi tulah,” sebut Taun. (red)