Urung Lebaran

Hari lebaran lum lame ni, Pak Beluk merana. Lantaran baju alapnye untuk lebaran dimakan tikus. Iluk ini ceritenye.

Pak Beluk tahun 2023 udimni beli baju alap batan lebaran. Yung Pantit ngan ndungnye beli pule, lagi dapat tanci udim musim buah kawe.

Singgenye pas dapat tanci hasil jual buah kawe sibuk bepoya-poya. Mulai jak baju alap sampai topi alap dibelinye gale.

Amen Yung Pantit ngan ndungnye nyetel udim pas dapat baju alap. Hampir seminggu sekali dipakai terus, dide pule ndak nunggu lebaran.

Amen Pak Beluk, pas dapat baju alap dengan celane masa kini tu de dipakai. Langsung disimpan dalam lemarinye. Ndik pakai dibuka lagi lemari, dilarang Pak Beluk. 

Anye die dide tau, pintu lemari ade lubang pas saje batan muatan badan tikus masuk.

Lah waktu masuk lebaran, Pak Beluk sambil besiul peci udim buka lemarinye ndak pakai baju alap ngan celane masa kini lagi tren tu.

Ayay pas dibuka pintu lemari, tikus besaghang anak beghanak dalam lemari tu. Saking banyaknye, anak tikus nye masih abang ade belasan.

“Cacam, inilah amen baju alap jangan kan jeme, tikus saje galak tiduk dibaju alapni,” Pak Beluk ngecik sughang, masih riang waktu itu.

Nah, pas lah diambik jak lipatan baju dengan celanenye tadi, bukan main kecewa. Baju ngan celanenye lah belubang gale dimakan tikus anak begganak dalam lemari tu.

“Udim,… Dide jadi lebaran ini Ndung Yung,” kate Pak Beluk, bersedih.

“Ngape Bapang Yung? Madaklah ngambik lipatan baju alap,” timbal Ndung Yung Pantit.

“Baju dengan celane akuni lah diembat tikus anak beghanak,” timbal Pak Beluk.

“Kecewa akuni, dide pule aku ndak sembayang lebaran,” uji Pak Beluk agi.