Keruan Tuhan

PAK Beluk merenung sughang di berande ghumahnye, sedang asyik merenung tetibe kantin akrbanye Merin sampai. Pak Beluk sempat tekejut ketike Merin negur, tapi kenan mulai biasa saje. Due bekantin ini mulai asyik ngobrol ye dide naikah pembelanjean antakah reraye.

“Belum ade pecah pause kabah bapang Yung,” tanye Merin santai.

Sambil tesenyum Pak Beluk njawab “Alhamdulillah belum, ce. Lah tue kite ini, jadi maluan pule pause pecah. Mase kalah dengan bebudah lebuk, awak tue ini semestinye njadi contoh raban tu”.

Sambil tesenyum besak Merin nyahut “ Mantap nian kicik kabah tu, anye aku was – was saje. Kele kicik itu dide nunggu nian, alasan maglah atau kerje berat kapu. Semingge pause ye kabah kerjekah dide sesuai dengan kicikan”.

“Ai ice, jangan madakah nian mbak itu. Kejadian model itukan lah udim kite lalui, jadi waktunye kite sadar diri kudai,” timbal Pak Beluk PD nian.

Sambil santai Merin ngicik “Tapi sare nian pule puase ini au ce, peghut telepit kecik nian. Tambah agi banguk masam nian dide ngudut ini. Aku dide buhung, jam 10 akap tu mbuni nian peghut aku. Ceki mintak diisi dengan nasi kapuh”.

Nganing kicik kantinye mulai mancing, Pak Beluk mulai tebawe suasana. Kenan nyahut “Aku kire aku sughang model itu, jadi aku takutan becerite dengan kabah bro. Nyatenya kite semegi, wajar nian waktu jama 10 an tu jeme mbanyak mendam, kelaparan kirenye”.

“Tapi apelah ide kabah ngakali model itu ce, semestinye ade solusi puase ini. Misalkah, puase ye sebulan diganti dengan tige hari tige malam. Aku rase lemaklah nahan tige hari tige malam dari sebulan ce,” sahut Merin cak dide.

Sahut Pak Beluk sekilas “Kalau aku sepakat nian, anye kalau dide diterime hukum tuhan ce”.

“Itulah jika, tapi aku ade solusinye. Puase kitekan paling belakang, ngikut pemerintah. Jadi kalau ngurangi dikit ade carenye ce,” sahut Merin serius.

“Ape die, cete ide kabah tu,” tanggap Pak Beluk senian.

“Kalau kite puase kite ngikut pemerintah, kalau reraye lukmanelah kite ngikut ye paling ndulu saje. Jadi ade juge kurangnye sakat,” sahut Merin.

Agam mendam Pak Beluk, akhirnye die ngicik “Masuk akal kicik kabah itu. Anye lukmane die hukumnye, kele dide dianggap sebulan. Sebab ape ye kite kerjekah itu lah tebace tuhan, sebab die mahe kuase ce. Aku selire nian, tapi itulah masalahnye, keruan tuhan akal kite itu,” kate Pak Beluk sedih.