Lengit Melawan

PAK Beluk serius nian ndesak Merin, sebab kenan nganing tegauk dimalam. Bahkan banyak jeme penasaran dengan Merin, sebab udim tegauk Merin belaghi kencang nian balik. Anya tiap betanye Merin selalu nginak, dide galak cerite.

“Aku penasaran ngape kabah tegauk dimalam, udim tu kabah belaghi njak saping ghumah Taun,” tanye Pak Beluk serius.

Ngadapi tanyean Pak Beluk nampaknye Merin dide senang, die ngeles “Aku tekejut saje ce, dide ain ye lain”.

Nganing kantinye mulai nginak Pak Beluk dide habis akal. Kenan mulai bejiji “Kalau mbak itu betul nian gosip jeme tu. Udim, dide agi pule aku penasaran”.

Merin mulai agak penasaran dengan kicik Pak Beluk  dei betanye “Ape die gosip jeme tentang aku bapang Yung”.

“Kate jeme kabah kini mulai bidapan ngimbang bini jeme, waktu kabah tegauk itu kene pentung bini Taun,” kate Pak Beluk uluk ada.

Nganing kicik itu Merin naik emosi “Kate siape, kicikah Bapang Yung. Kela aku lanjui jeme itu ke ghumahnye. Aku dide ade ngimbang, sebelum aku tegauk itu aku kah beghusik ke badah Taun. Anye waktu melintas di bawah mangga samping ghumah die, aku kene kecak tangan bebulu waktu itu. Aku tekejut dan tagauk, aku pikir jeme alam lain”.

“Ooooo kabah kene kecak tangan bebulu waktu itu, tapi ape die ngecaki kabah waktu tu,” tanye Pak Beluk serius.

“Au aku kene kecak tangan  bebulu, aku penasaran juige awalnye. Anye waktu akap aku datangi ghumah Taun untuk becerite. Anye waktu aku datang, aku kinak di samping ghumahnye itu ade beghuk, jadi tangan beghuk ye ngecak aku itu,” kate Merin pajang libagh.

“Oooo, jadi kene kecak beghuk kabah jadinye. Aiii kalah gertak kabah waktu itu sampai tegauk panjang, lengit melawan kabah jadinye. Sementare kabah dikenal jeme sedusuni preman,” kate Pak Beluk tetawe.  

Merin mendam saje, sebab rahasie die tebongkar dide sengaje.*